áætlun um vernd og orkunýtingu landsvæða.
Virðulegi forseti. Sú ábending sem hér hefur komið fram varðandi nefndir er mjög mikilvæg vegna þess að nú þegar hillir undir lok þingsins er verið að vinna mjög hratt í mörgum nefndum. Verið er að kalla inn síðustu hollin af gestum, byrjað er að setja saman nefndarálit og þingmenn þurfa að hafa ráðrúm til að meta hvort þeir séu á meirihlutaáliti eða þurfi að vera á sérstöku áliti, leggja fram breytingartillögur o.s.frv. Það er óviðunandi að formönnum nefnda sér bara selt sjálfdæmi um hvenær þeir boða fundi og þingmenn lendi í því hver á fætur öðrum að nefndafundir í nefndum sem þeir eiga sæti í rekist á og þar með missi þeir samfelluna í umfjöllun þeirra mála sem eru á lokasprettinum í meðförum nefndarinnar. Ég hlýt að óska mjög eindregið eftir því, herra forseti, að það sé skoðað sérstaklega og að kippt sé inn einhvers konar bráðabirgðanefndatöflu til að koma í veg fyrir þennan árekstur.