fjáraukalög 2007.

Hæstv. forseti. Ég er hamingjusöm að heyra að hv. varaformaður nefndarinnar skuli vera mér sammála varðandi háskólasetrin, náttúrustofurnar og fyrirkomulag fjárveitinganna.

Varðandi Yarisinn er það greinilega ríkisstjórnin sem hefur komið með beiðni upp á 3 milljónir. Það er því hún sem ég hefði átt að beina mínu máli til í þeim efnum. Ég tel mjög misráðið að ætla einungis 3 milljónir til að leysa af hólmi bílinn sem valt og ég er sannfærð um að stærri bíl þarf en hægt er að kaupa fyrir 3 millj. kr.

Varðandi Náttúrufræðistofnun Íslands vil ég aðeins segja að ég hef ákveðnar efasemdir um að flytja Náttúrufræðistofnun Íslands í Garðabæ. Ég hef lýst efasemdum mínum, að ég telji að Náttúrufræðistofnun þurfi að búa í nánu sambýli við Náttúrugripasafnið sem verður eitt af höfuðsöfnunum og verið er að veita fjármuni til þess að koma því á laggirnar. Ef ég man rétt eru einar 14 milljónir í fjáraukalögum til að ráða forstöðumann og standa straum af kostnaði í þeim efnum. Ég vona auðvitað hið besta varðandi húsnæðismál Náttúrufræðistofnunar en ég gerði athugasemd við að inni í heimildarkaflanum er heimild til að leigja húsnæði fyrir Náttúrufræðistofnun Íslands sem, samkvæmt upplýsingum úr fjárlögunum, ekki er þörf fyrir því að ekki verður leigt á næsta ári.