kostnaður við gerð Héðinsfjarðarganga, Fáskrúðsfjarðarganga og ganga um Almannaskarð.
Hæstv. forseti. Hv. þm. Árni Johnsen hefur borið fram fyrirspurn um kostnað við gerð Héðinsfjarðarganga, Fáskrúðsfjarðarganga og ganga um Almannaskarð sem er skipt niður í nokkuð marga liði, eða í 10 liði. Ég mun nú á þeim fimm mínútum sem ég hef reyna að fara yfir þá.
Í fyrsta lagi er spurt um bein tilboð við göngin. Því er til að svara að Fáskrúðsfjarðargöng voru boðin út í desember 2002 og tilboð opnuð 17. febrúar 2003. Fjögur tilboð bárust í verkið. Það lægsta var frá Ístaki og E. Pihl & Søn, eða 3,2 milljarðar. Það var tæpum 3% yfir verktakakostnaði en áætlaður verktakakostnaður við það verk var 3,16 milljarðar. Allar þessar tölur eru á verðlagi sem gilti á útboðstímanum.
Um Almannaskarðsgöng er þetta að segja. Þau voru boðin út í desember 2003 og tilboð voru opnuð 27. janúar 2004. Það komu fimm tilboð í verkið. Þau voru frá Jarðvélum ehf. upp á 1,1 milljarð, NCC og Íslenskum aðalverktökum upp á 959 millj. kr., Ístaki upp á 856 millj. kr., Arnarfelli upp á 797 millj. kr., Héraðsverki ehf. og Leonard Nilsen & Sønner upp á 779 millj. kr. sem reyndist lægsta tilboðið eða 91% af verktakakostnaði. Áætlaður verktakakostnaður þar var 856 millj. kr. rúmar. Sama er þar, tölurnar eru miðaðar við verðlag útboðstímans.
Í framhaldi af vali á verktökum voru Héðinsfjarðargöng boðin út öðru sinni í janúar 2006 og tilboð opnuð 21. mars sama ár. Það bárust fimm tilboð í verkið sem voru frá Marti Contractors og Íslenskum aðalverktökum upp á 8,9 milljarða kr., Ístaki upp á 6,5 milljarða, Arnarfelli upp á 6,1 milljarð, Leonard Nilsen & Sønner og Héraðsverki ehf. upp á 5,8 milljarða og Metrostav og Háfelli ehf. upp á 5,7 milljarða kr. sem reyndist lægsta tilboðið sem var um 89% af verktakakostnaði sem var 6,46 milljarðar. Allar þessar tölur eru líka á verðlagi á útboðstímanum.
Í öðru lagi er spurt um lengd ganganna. Fáskrúðsfjarðargöng eru 5,9 km að vegskálum meðtöldum. Almannaskarðsgöng 1,3 km og Héðinsfjarðargöng eru 11 km, líka að meðtöldum vegskálum.
Í þriðja lagi er spurt um kostnað við umhverfismat. Í Fáskrúðsfjarðargöngunum var kostnaður við umhverfismatið 14 millj. kr. Ekki var talin þörf á umhverfismati og kostnaði við mat á umhverfisáhrifum við Almannaskarðsgöng. En í Héðinsfjarðargöngum var kostnaður við umhverfismat 54 millj. kr.
Í fjórða lagi er spurt um hönnunarkostnað. Hönnunarkostnaður var 122 millj. kr. fyrir Fáskrúðsfjarðargöng, 34 millj. kr. í Almannaskarðsgöngum og 178 millj. kr. í Héðinsfjarðargöngum.
Í fimmta lagi er spurt um eftirlitskostnað. Hann var 211 millj. kr. við Fáskrúðsfjarðargöng, 80 millj. kr. við Almannaskarðsgöng og 156 millj. kr. í Héðinsfjarðargöngum til ársloka 2007.
Í sjötta lagi var spurt um kílómetraverð eftir tilboðum. Því er til að svara að við Fáskrúðsfjarðargöng hefur heildarkostnaður á kílómetra jarðganga verið 872 millj. kr., 1.255 millj. kr. við Almannaskarðsgöng og heildarkostnaður miðað við uppfærða áætlun, 840 millj. kr. á kílómetra í Héðinsfjarðargöngunum.
Í sjöunda lagi, virðulegi forseti, er spurt um rannsóknarkostnað. Hann var 57 millj. kr. í Fáskrúðsfjarðargöngum, 16 millj. kr. í Almannaskarðsgöngum og 127 millj. kr. við Héðinsfjarðargöng.
Endanlegur kostnaður eða áætlun við Fáskrúðsfjarðargöng eru 4.965 millj. kr. á verðlagi í febrúar 2008. 1.444 millj. kr. á verðlagi í febrúar 2008 fyrir Almannaskarðsgöng og fyrir Héðinsfjarðargöng er heildarkostnaður í árslok 2007 3.925 millj. kr. á verðlagi í febrúar 2008.
Í níunda lið er spurt um aðra þætti sem skipta máli. Ég held að það séu ekki aðrir þættir en þeir sem sem ég hef svarað þar á undan. Varðandi framkvæmdatímann eða lokaáætlanir þá var Fáskrúðsfjarðargöngunum lokið í nóvember 2005. Almannaskarðsgöngum var lokið í júní 2005 og áætlaður lokatími við Héðinsfjarðargöng er í árslok 2009 og þá er ég kominn á rautt ljóst, virðulegi forseti, og tel mig hafa svarað þessu eftir bestu getu.