lán Landsbankans til Jóns Ásgeirs Jóhannessonar.
Virðulegi forseti. Ég endurtek það sem ég sagði áðan að eftir þeim heimildum sem ég hef frá bankaráði Landsbankans hefur ekki króna verið lánuð þaðan til kaupa á neinum fjölmiðlum (GÁ: ... fyrirtækin voru seld.) og engin fyrirtæki hafa verið seld eftir því sem kemur fram í þeim upplýsingum sem ég hef, engin fyrirtæki hafa verið seld þar. (Gripið fram í.) Nei, nei, eins og við sáum í blöðunum í morgun eru þessi mál ekki frágengin og Landsbankinn hefur ekki lánað krónu þar.
Hvað varðar Kaupþingsmálið og afskriftir á því kom það fram í yfirlýsingum bæði frá gamla Kaupþingi og nýja Kaupþingi að þetta væri gjörningur sem var gerður með bókun í stjórn gamla Kaupþings í lok september. Nýja Kaupþingsstjórnin hefur farið fram á að honum verði rift. Nú er málið rannsakað af Fjármálaeftirliti og menn í efnahagsbrotadeild og annars staðar hafa tjáð sig um það. Það er mjög alvarlegt mál og menn hafa bent á að ef það stenst gæti það verið skattskylt upp á 14–18 milljarða. Þetta er hins vegar mjög líklega riftanlegur gjörningur og óeðlileg eftirgjöf. Rannsókn málsins er í eðlilegum farvegi. Það er ekki okkar að dæma menn og stofnanir úr ræðustóli Alþingis. Það eru galdrabrennur. (Forseti hringir.) Við látum rannsaka málið og síðan kemur í ljós hvernig í því liggur.