Stjórnarráð Íslands.

Virðulegi forseti. Þetta var yfirgripsmikil ræða hjá hv. þingmanni. Mig langar að koma inn á eitt atriði sem hann sagði a.m.k. tvisvar eða þrisvar sinnum. Hann sagði: Stjórnsýslan brást. Hvað er stjórnsýslan í huga hv. þingmanns? Mér finnst ég heyra þetta of oft úr ræðustól Alþingis og spyr: Voru ráðherrar ekki hluti stjórnsýslunnar? Eru ráðherrar ekki yfirmenn stjórnsýslunnar? Eru stjórnmálamenn ekki þeir sem eiga að hafa eftirlit með stjórnsýslunni? Er sanngjarnt og rétt að standa í þessum stól æ ofan í æ og segja: Stjórnsýslan brást? Voru það ekki stjórnmálamennirnir sem brugðust?