ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Frú forseti. Ég held að álitaefnið hér sé hvort hægt sé að fella ákvæðið úr stjórnarskránni um þjóðkirkjuna án þess að um það fari fram þjóðaratkvæðagreiðsla (Gripið fram í: Sérstök …?) Sérstök? Já, ég tel að samkvæmt stjórnarskránni eigi fólkið í landinu rétt á því að fram fari sérstök þjóðaratkvæðagreiðsla um það. Ég sé ekki að hægt sé að bjóða upp á að greidd verði atkvæði í einni og sömu atkvæðagreiðslunni um nýja stjórnarskrá í heild sinni þar sem þetta ákvæði hefur verið fellt út. Ég held að ég og hv. þingmaður horfum með ólíkum hætti á málið, hvort það að fella út þjóðkirkjuákvæðið í stjórnarskránni telst vera breyting á kirkjuskipaninni eða ekki.

Mér sýnist að það sé breyting á kirkjuskipaninni en hv. þingmaður segir að það sé allt saman ákveðið í almennum lögum. Það er að minnsta kosti efni í sérstaka skoðun í nefndinni.