störf þingsins.
Virðulegur forseti. Vegna þeirra orða sem hér féllu þá er það auðvitað býsna furðulegt að vera hér viku eftir viku án þess að nokkur stjórnarmálefni að heitið geti séu á dagskrá þingsins en það er nú kannski frekar gleðiefni en áhyggjuefni fyrir okkur sum.
Það er hins vegar ánægjulegt í dag að sjá Peningamál Seðlabankans koma út og staðfesta að mörgu leyti það góða bú sem ný ríkisstjórn tekur við og þann mikla efnahagslega viðsnúning sem orðið hefur í landinu á skömmum tíma. Við sáum að hagvöxtur í landinu á liðnu ári varð ívið meiri en spáð hafði verið, verðbólgan er enn á niðurleið og mörg jákvæð teikn í okkar efnahagsmálum, þökk sé þrotlausu starfi fólks og fyrirtækja í landinu allt frá hruni.
Það eru hins vegar ýmsar blikur á lofti og það sem skiptir okkur mestu máli til að halda stöðugleika í efnahagsmálum í landinu er tvennt, annars vegar að halda verðstöðugleika og hins vegar að tryggja frið á vinnumarkaði.
Það er eitt þingmál sem ég sakna frá ríkisstjórninni og kalla eftir, eitt þingmál vil ég sjá frá ríkisstjórninni hér á dagskrá þingsins. Það er frumvarp um að afturkalla hækkanir ríkisstjórnarinnar á gjöldum á nýju ári, að ríkisstjórnin komi hér inn með frumvarp, eða fjármálaráðherra Bjarni Benediktsson, fylgi fordæmi sveitarfélaganna í landinu og hafi pólitískt þrek til að hætta við þær óhóflegu gjaldskrárhækkanir sem ákveðnar voru hér á nýju ári, ekki síst á skólagjöldum og á gjöldum á heilsugæslustöðvum en líka ýmsar verðlagshækkanir sem nú eru orðnar miklu hærri en verðbólgan er núna.
Ég kalla eftir því að ríkisstjórnin taki þátt í baráttunni gegn verðbólgunni og að ríkisstjórnin geri betur í því að koma til móts við aðila vinnumarkaðarins með aðgerðum sínum og fylgi því góða fordæmi sem Reykjavíkurborg setti með því að afturkalla gjaldahækkanir með öllu.
