áætlun um vernd og orkunýtingu landsvæða.
Herra forseti. Varðandi vísan málsins sem ég hef verið að hugleiða betur er það þannig að hæstv. umhverfisráðherra heitir ekki aðeins umhverfisráðherra heldur heitir hann umhverfis- og auðlindaráðherra og ráðuneytið heitir ekki aðeins umhverfisráðuneyti heldur umhverfis- og auðlindaráðuneyti. Þetta er vel útskýrt í gögnum sem fylgdu stjórnarúrskurðinum um verkaskiptingu innan Stjórnarráðsins þegar nafnbreytingin varð á ráðuneytinu og því var falið skilgreint hlutverk á sviði auðlindamála, í sjálfu sér hvort sem um er að ræða verndun auðlindanna eða sjálfbæra nýtingu þeirra. Það var búið til sérstakt samstarfsfyrirkomulag t.d. milli atvinnuvega- og nýsköpunarráðuneytisins og umhverfis- og auðlindaráðuneytisins vegna hlutverks ráðuneytisins á sviði auðlindamála. Eftir því sem maður rifjar þetta betur upp og fer yfir það er náttúrlega sú hugmynd að vísa þessu eitthvert annað en í umhverfis- og samgöngunefnd gersamlega fráleit. Ég tel það hafið yfir allan málefnalegan vafa að það standist ekki, einfaldlega í ljósi þess hvernig um þetta er búið og að þingsköpin og verkaskipting hér speglist á við það sem er í Stjórnarráðinu. (Forseti hringir.) Ég held að forseti hljóti að sjá að það þarf að fara betur yfir þetta mál.
