tillaga stjórnarandstöðunnar um þjóðaratkvæðagreiðslu.

Virðulegi forseti. Ég vil gera athugasemd við það að tillögu sem formenn fjögurra stjórnarandstöðuflokka, Samfylkingarinnar, Vinstri grænna, Bjartrar framtíðar og Pírata, sem hefur verið lögð fram og dreift á þinginu, um að efna skuli til þjóðaratkvæðagreiðslu um Evrópusambandsmálið, megi ekki sjá á dagskrá fundarins í dag. Það hlýtur að vekja spurningu um hvað tefji þegar þingmenn fjögurra flokka af sex hér á þingi, formenn þessara flokka, leggja fram slíka tillögu. Af hverju fæst hún ekki sett á dagskrá til umræðu? Er þetta enn ein tilraunin til að halda þinginu frá umræðu um þau mál sem hafa verið í umræðu alls staðar annars staðar, liggur við, en í þinginu að undanförnu? Ég spyr mig og ég hlýt að gera kröfu um að þessi tillaga verði sett á dagskrá svo fljótt sem auðið er.