alþjóðleg þróunarsamvinna Íslands o.fl.

Virðulegur forseti. Ekki lái ég hv. þingmanni að eiga erfitt með að svara fyrir hönd ráðherra Framsóknarflokksins. Það er auðvitað skiljanlegt (Gripið fram í.) en rétt er vekja athygli á þeirri athyglisverðu stöðu að það skuli vera sá stjórnmálaflokkur sem í orði kveðnu segist vera á miðju íslenskra stjórnmála hvers ráðherrar virðast eiga erfiðara en forustumenn nokkurra annarra flokka í þinginu með að nálgast sjónarmið annarra eða miðla málum eða bjóða upp á samræðu um sameiginlega niðurstöðu. Þó er í þingflokki Framsóknarflokksins gott dæmi um hið gagnstæða sem er það glæsilega leiðtogahlutverk sem hv. formaður umhverfisnefndar tók sér í náttúruverndarlögunum á dögunum og hæstv. utanríkisráðherra mætti taka sér til fyrirmynda.

Ég vildi spyrja hv. þingmann hvort hún hafi áhyggjur af að þessar skipulagsbreytingar geti aukið hættu á spillingu í tengslum við Þróunarsamvinnustofnun, svo að við tölum bara hreina íslensku. Hér er auðvitað um að ræða ráðstöfun verulegra fjármuna í málaflokki þar sem slíkt í öðrum löndum hefur því miður margsinnis hent, ekki síst í samspili stjórnmálalífs og viðskiptalífs og í aðkomu þeirra síðartöldu að illa skilgreindum verkefnum með takmörkuðu eftirliti í löndum langt í burtu.