breytt skipan ráðuneyta í Stjórnarráði Íslands.
Hæstv. forseti. Ég vil til að byrja með þakka hv. þingmanni fyrir vangaveltur um þessi atriði sem hér eru nefnd sem varða verkefnatilflutning og verkaskiptingu og annað þess háttar. Í eldri lögum var gert ráð fyrir því að það væri í meginatriðum lögbundið hvaða verkefni heyrðu til hvaða ráðuneytis og breytingar á því þyrftu að koma til umfjöllunar í þinginu, þar á meðal að fara í gegnum þá opnu umræðu sem því fylgir í nefndarstarfi, umsögnum og umræðum í þingsal.
Ég heyri það á hv. þingmanni að hún hefur áhuga á því að ræða þessi mál og hefur skoðanir á þeim og í ljósi þess þá vil ég spyrja hv. þingmann hvort hún telji að það sé endilega heppilegt að ákvarðanir um þessi efni komi ekkert til meðferðar á þinginu, hvort hún telji að forsætisráðherra eða ríkisstjórn eigi að hafa sjálfdæmi um að taka ákvarðanir um hvaða ráðuneyti eru starfandi í landinu og hver verkefni þeirra eigi að vera, hvort það komi þinginu ekki við og hvort þingið eigi ekki að koma að málsmeðferð í því sambandi með neinum hætti.