meðferð krónueigna sem háðar eru sérstökum takmörkunum og gjaldeyrismál.

Herra forseti. Ég þakka hv. þingmanni fyrir andsvarið. Það er athyglisvert hvernig hann setur þetta fram og hárrétt. Ég verð að segja að ég var mjög hissa á málflutningi formanns efnahags- og viðskiptanefndar, hv. þm. Óla Björns Kárasonar, hvað þetta varðar. Við sjáum bara hverjar aðstæðurnar eru í þjóðfélaginu í dag. Það er óvissa fram undan. Kjarasamningar eru lausir og reyndar búið að slíta viðræðum og það stefnir í verkföll og mikil óvissa hvað það varðar. Við vitum ekki nákvæmlega hvernig gengið þróast og í framhaldi af þessu öllu saman er fyrirsjáanlegur samdráttur í efnahagslífinu. Við sjáum það í dagblöðum dagsins í dag að komnar eru uppsagnir í byggingargeiranum sem þýðir að það er að draga úr framkvæmdum. Það eru öll þessi teikn á lofti sem gera það að verkum að það er óvissa í efnahagslífinu. Á þeim sama tímapunkti er komið fram með frumvarp sem getur haft veruleg áhrif á efnahagslífið, á gengisþróunina, verðbólguþróun o.s.frv. Þá spyr maður: Hvers vegna er gengið fram svona hratt með þetta mál? Upphaflega var vonast til þess að hægt væri að ganga frá því á einum degi. Þá spyr maður: Eru einhverjir aðrir hagsmunir þarna á bak við sem við höfum ekki fengið upplýsingar um? Það væri fróðlegt að fá að vita það.

Það er erfitt að fá að vita hverjir eru eigendur þessara aflandskrónueigna sem á að fara að skipta í dýrmætan gjaldeyri og fara með úr landinu (Forseti hringir.) þannig að það er margt í þessu sem vekur spurningar.