félagsleg aðstoð og almannatryggingar .
Virðulegi forseti. Ég flyt hér nefndarálit um frumvarp til laga um breytingar á lögum um félagslega aðstoð og lögum um almannatryggingar, eða um framfærsluuppbót og eingreiðslu. Nefndin hefur fjallað um málið og bárust henni tvær umsagnir. Í umsögn Öryrkjabandalags Íslands er hvatt til þess að afgreiðslu málsins verði flýtt.
Í frumvarpinu er að finna tillögur að breytingum sem lúta að greiðslu sérstakrar uppbótar vegna framfærslu til örorku- og endurhæfingarlífeyrisþega. Fjárhæðir tekjuviðmiða vegna greiðslu sérstakrar uppbótar á lífeyri vegna framfærslu eru uppfærðar að viðbættri 3,6% hækkun sem gert er ráð fyrir í frumvarpi til fjárlaga ársins 2021. Miðast viðmiðunarupphæð þeirra sem fá greidda heimilisuppbót við 333.258 kr. á mánuði og þeirra sem ekki fá greidda heimilisuppbót við 265.044 kr. á mánuði. Fjárhæðirnar hafa áður verið uppfærðar með reglugerð sem ráðherra setur, en skýrara þykir að hafa uppfærða fjárhæð í lögum.
Þá er með frumvarpinu lagt til að dregið verði úr áhrifum tekjutryggingar örorku- og endurhæfingarlífeyrisþega við útreikning sérstakrar uppbótar þannig að til tekna lífeyrisþega skuli telja 95% af fjárhæð tekjutryggingar.
Þetta frumvarp fjallar um tvennt og hitt er sérstök eingreiðsla. Með frumvarpinu er lögð til sérstök skattfrjáls eingreiðsla til þeirra örorku- og endurhæfingarlífeyrisþega sem hafa á árinu 2020 átt rétt á greiðslu örorkulífeyris eða endurhæfingarlífeyris. Eingreiðslan skal vera 50.000 kr. til þeirra sem hafa fengið greiddar bætur alla mánuði ársins og hlutfallsleg til þeirra sem fengið hafa greiddar bætur hluta árs. Nefndin leggur áherslu á að sérstök eingreiðsla verði greidd út tímanlega fyrir jól.
Nefndin telur brýnt að tryggja hraðan framgang málsins og leggur til að frumvarpið verði samþykkt óbreytt. Það var einbeittur vilji allra í nefndinni að við myndum afgreiða þetta fljótt og vel og því er þetta komið fram núna.
Hanna Katrín Friðriksson, áheyrnarfulltrúi í nefndinni, er samþykk áliti þessu og undir álitið skrifa Helga Vala Helgadóttir, Halla Signý Kristjánsdóttir, Ásmundur Friðriksson, Anna Kolbrún Árnadóttir, Guðmundur Ingi Kristinsson, Lilja Rafney Magnúsdóttir, Ólafur Þór Gunnarsson, Sara Elísa Þórðardóttir og Vilhjálmur Árnason.
Það var gaman að vinna að þessu máli, þetta gekk fljótt yfir og allir voru sammála. Kannski hefur meira verið talað um þessa eingreiðslu upp á 50.000 kr. en strax á næsta ári, sem er mjög ánægjulegt, er líka reiknað með hækkun bótaframlaga til tekjulægsta hópsins en heildarhækkun bóta almannatrygginga og félagslegrar aðstoðar til tekjulægstu lífeyrisþeganna um næstu áramót verður um 19.700 kr. á mánuði sem er 6,1% hækkun frá því sem nú er. Það eru gríðarlega miklar framfarir og mér finnst það skipta máli auk þess sem eingreiðslan mun örugglega koma sér vel.
