útlendingar.

Virðulegur forseti. Hér áðan las ég upp nýframkomna sameiginlega áskorun nokkurra ungliðahreyfinga þar sem er skorað á hlutaðeigandi aðila hér og í ríkisstjórninni að draga þetta frumvarp til baka og byrja frá grunni á mannúðlegri forsendum. Það er ekkert nýtt í því að svoleiðis áskoranir komi fram. Það hefur verið rakið hér úr ræðustól hversu lítill stuðningur er í raun við frumvarpið og hvað stuðningur hefur verið takmarkaður alveg frá upphafi. Það hefur líka verið komið inn á hvað ákallið um samráð og önnur vinnubrögð hefur verið skýrt. Eitt skýrasta dæmið er þegar búið var að fjalla um fjórðu útgáfu þessa frumvarps í 1. umr. og það var komið í vinnu inni í nefnd, þetta var í maí í fyrra, þá gáfu nokkur félagasamtök út sameiginlega yfirlýsingu þar sem afstaða til þessa frumvarps var látin í ljós og kallað var eftir öðrum vinnubrögðum. Ég ætla að fá að lesa upp alla vega hluta hennar, eins og tíminn leyfir, bara til að minna á hvað ákallið hefur verið skýrt og minna á hvað hefur verið hunsað. Yfirlýsingin hefst svona, með leyfi forseta:

„Alþingi hefur nú lokið fyrstu umræðu um frumvarp dómsmálaráðherra um breytingar á útlendingalögum. Frumvarpið er nú endurflutt í fjórða sinn en í örlítið breyttri mynd frá því frumvarpi sem birt var til umsagnar í Samráðsgátt í lok janúar sl. Endurtekið hefur komið fram fjöldi umsagna um efni frumvarpsins og því ljóst að það er mjög umdeilt. Eftirtaldir aðilar lýsa því yfir áhuga og vilja á því að koma á samráði og samvinnu um mótun laga í málaflokknum. Útlendingalöggjöfina þarf að þróa áfram af ábyrgð og raunsæi til framtíðar. Til að tryggja víðtæka sátt er mikilvægt að auka traust og gagnsæi um ákvarðanir útlendingayfirvalda, sem og móta skýra og heildstæða stefnu í málaflokknum, enda væri það í anda stjórnarsáttmála núverandi ríkisstjórnar og markmiða hennar. Allsherjar- og menntamálanefnd Alþingis hefur nú sent frumvarpið til umsagnar á ný. Núverandi frumvarp er í meginatriðum það sama og áður hefur verið birt til umsagnar í Samráðsgátt. Í umsögnum um fyrri útgáfu frumvarpsins hafa umsagnaraðilar frá stofnunum og samtökum lýst yfir skorti á samráði við gerð frumvarpsins auk verulegra vankanta á efni frumvarpsins.“

Ég ætla að sleppa aðeins hér úr vegna tíma. Ég held áfram lestrinum, með leyfi forseta:

„Í fyrstu umræðu Alþingis um frumvarpið kom fram að mikil vinna væri fyrir höndum fyrir allsherjar- og menntamálanefnd og að frumvarpið þurfi að skoða gríðarlega vel, bæta þurfi kerfið og jafnvel kalla til sérfræðinga ef þörf er á. Við viljum því með þessari sameiginlegu yfirlýsingu benda á að áður en lög sem þessi eru mótuð og skrifuð teljum við rétt að samráð verði haft við alla þá hagsmunaaðila sem að málaflokknum koma svo lögin tryggi að réttindi þeirra sem sækja um alþjóðlega vernd séu vernduð og virt í hvívetna. Þá fyrst verður hægt að ná þeirri þverfaglegu sátt sem tókst við mótun fyrri laga.

Við skorum því á ríkisstjórnina að stíga skref til baka, dýpka samtalið og samráðið og þannig ná faglegri sátt líkt og áður hefur tekist. Alþýðusamband Íslands, Barnaheill – Save the Children á Íslandi, Geðhjálp, Hjálparstarf kirkjunnar, Íslandsdeild Amnesty International, Kvenréttindafélag Íslands, Landssamtökin Þroskahjálp, Mannréttindaskrifstofa Íslands, Rauði krossinn á Íslandi, Samtökin '78, Siðmennt, WOMEN in Iceland, UN Women á Íslandi, UNICEF á Íslandi, ÖBÍ.“

Þetta var staðan þá og þetta er staðan nú.