Hlutafélög
102. mál á 141. löggjafarþingi.
Atvinnuvega- og nýsköpunarráðherra.
Markmið
Að auka gegnsæi í rekstri opinberra hlutafélaga og tryggja að starfsreglur stjórna slíkra félaga séu í samræmi við eigendastefnu ríkis eða sveitarfélaga.
Helstu breytingar og nýjungar
Lagt er til að stjórnir félaga sem falla undir lögin starfi samkvæmt eigendastefnu. Lagðar eru til breytingar er varða boðun aðalfunda, birtingu fundargerða þeirra og að fulltrúar starfsmanna hafi sama rétt og kjörnir fulltrúar ríkis eða sveitarfélaga til að bera fram skriflegar fyrirspurnir á aðalfundum.
Breytingar á lögum og tengd mál
Lög nr. 2/1995, um hlutafélög, og lög nr. 138/1994, um einkahlutafélög.
- Endurflutt: Hlutafélög, 703. mál (efnahags- og viðskiptaráðherra) á 140. þingi (30.03.2012)
- Skylt mál: Hlutafélög, 661. mál (efnahags- og viðskiptanefnd) á 141. þingi (08.03.2013)
Kostnaður og tekjur
Hefur ekki áhrif á fjárhag ríkisins.
Umsagnir (helstu atriði)
Gerðar eru athugasemdir við 6. gr. frumvarpsins, sem kveður á um trúnaðaryfirlýsingu stjórnarmanna í opinberum hlutafélögum (ohf.) við eigendastefnu ríkisins, en slík yfirlýsing er meðal annars talin andstæð þeim almennu skyldum sem lagðar eru á stjórnarmenn, skv. 76. gr. laganna um að gæta hagsmuna allra hluthafa.
Afgreiðsla
Var ekki afgreitt úr nefnd. Efnahags- og viðskiptanefnd flutti frumvarp, 661. mál, um breytingar á 86. gr. laga um hlutafélög til þess að innleiða EES-reglur, samhljóða 3. gr. þessa frumvarps. Frumvarp nefndarinnar var samþykkt.Aðrar upplýsingar
Tilskipun Evrópuþingsins og ráðsins 2007/36/EB, um nýtingu tiltekinna réttinda hluthafa í skráðum félögum.