Ráðstafanir til hagkvæmrar uppbyggingar háhraða fjarskiptaneta
122. mál á 150. löggjafarþingi.
Samgöngu- og sveitarstjórnarráðherra.
Markmið
Að innleiða tilskipun Evrópusambandsins um ráðstafanir til að lækka kostnað við uppbyggingu á háhraða rafrænum fjarskiptanetum. Að stuðla að og hvetja til hagkvæmari uppbyggingar háhraða fjarskiptaneta með því að auðvelda sameiginlega nýtingu á núverandi efnislegum grunnvirkjum og með því að hvetja til skilvirkari uppbyggingar á nýjum efnislegum grunnvirkjum þannig að útbreiðsla slíkra neta sé möguleg með lægri kostnaði.Helstu breytingar og nýjungar
Lagt er til að fjarskiptafyrirtæki geti beðið um tilteknar lágmarksupplýsingar rekstraraðila neta um annars vegar fyrirliggjandi efnisleg grunnvirki og hins vegar yfirstandandi eða fyrirhugaða leyfisskylda mannvirkjagerð í því skyni að kanna möguleika á samnýtingu fyrirliggjandi innviða eða samhæfingu framkvæmda í því skyni að hraða uppbyggingu háhraða fjarskiptaneta. Gert er ráð fyrir að rekstraraðilum beri skylda til að verða við réttmætum beiðnum um aðgang að fyrirliggjandi efnislegum grunnvirkjum með uppbyggingu háhraða fjarskiptaneta í huga, samkvæmt sanngjörnum og eðlilegum skilmálum, þ.m.t. um verð. Synji rekstraraðili nets slíkri beiðni eða náist ekki samningar um skilmála og skilyrði er lagt til að báðum málsaðilum verði heimilt að vísa málinu til ákvörðunar Póst- og fjarskiptastofnunar. Einnig er gert ráð fyrir að sérstakar skyldur séu lagðar á þá rekstraraðila nets sem standa beint eða óbeint að mannvirkjagerð sem að hluta eða öllu leyti er fjármögnuð úr opinberum sjóðum. Lagt er til að Póst- og fjarskiptastofnun leysi úr ágreiningi milli aðila sem kann að koma upp við túlkun ákvæða með bindandi ákvörðun. Samhliða myndi stofnunin einnig þjóna sem miðlæg upplýsingaþjónusta og annast milligöngu upplýsingaöflunar fyrir fjarskiptafyrirtæki gagnvart rekstraraðila nets, sé þess óskað.Breytingar á lögum og tengd mál
Um er að ræða ný lög en við gildistöku laganna verða breytingar á lögum um fjarskipti, nr. 81/2003, og lögum um Póst- og fjarskiptastofnun, nr. 69/2003.- Endurflutt: Ráðstafanir til hagkvæmrar uppbyggingar háhraða fjarskiptaneta, 639. mál (samgöngu- og sveitarstjórnarráðherra) á 149. þingi (04.03.2019)
Kostnaður og tekjur
Ekki er gert ráð fyrir áhrifum á afkomu ríkissjóðs.Afgreiðsla
Samþykkt með lítils háttar breytingum, sem eru tæknilegs eðlis.Aðrar upplýsingar
Tilskipun Evrópuþingsins og ráðsins (ESB) 2014/61 frá 15. maí 2014 um ráðstafanir til að lækka kostnað við uppbyggingu á háhraða rafrænum fjarskiptanetum.
Stafræn áætlun fyrir Evrópu – Stafræn tækni sem drifkraftur fyrir vöxt í Evrópu (The Digital Agenda for Europe – Driving European growth digitally). Framkvæmdastjórn Evrópusambandsins, 2012.
Verkefnið
Ísland ljóstengt (í umsjá fjarskiptasjóðs).
