Steingrímur J. Sigfússon:
Herra forseti. Við í þingflokki Alþb. og óháðra stöndum að þessari frávísunartillögu ásamt með öðrum stjórnarandstöðuflokkum. Við teljum vinnubrögð hæstv. ríkisstjórnar í öllu þessu máli vera óverjandi. Með þessu máli, bæði vinnubrögðunum og innihaldi þess, er hæstv. ríkisstjórn að segja í sundur friðinn og efna til ófriðar á vinnumarkaði sem engin leið er að sjá fyrir endann á hvaða afleiðingar hefur.
Síðast en ekki síst er einhliða verið að raska lögbundnum réttindum launamanna á gildistíma kjarasamnings. Slíkt er óverjandi framkoma og getur ekki leitt til annars en ófarnaðar. Það er því öllum fyrir bestu og sérstaklega hæstv. ríkisstjórn og meiri hluta hennar á Alþingi að þetta mál verði tekið af dagskrá þingsins. Við segjum því já við tillögu um að vísa því aftur til föðurhúsanna, þ.e. ríkisstjórnarinnar.