Kristín Halldórsdóttir (andsvar):
Herra forseti. Þetta fer náttúrlega að bera keim af stagli. Auðvitað erum við hv. þm. Hjálmar Jónsson innilega sammála í þessu máli, að ölvun og akstur fara ekki saman. Það sem við erum ekki sammála um er hversu fljótt og hvernig eigi að taka á því máli og hv. þm. segir eins og mér finnst hafa komið fram í umræðunni, að það sé álitamál hver mörkin eigi að vera. Ég spyr mig aftur og aftur, hvers vegna er það álitamál? Mér finnst það ekkert álitamál og ég þarf ekkert álit sérfræðinga á því hvort það sé álitamál hvort ég eigi að vera sett í þá stöðu að spyrja mig hvort ég megi fara og aka bílnum eftir eitt glas af rauðvíni eða einn bjór eða eitthvað slíkt.