[prenta uppsett í dálka] 75. fundur, 125. lþ.
Kristján Pálsson:
Herra forseti. Mér finnst mjög langt til seilst þegar verið er að jafna launum yfirmanna Fjárfestingarbanka atvinnulífsins við skipstjóra á togskipum eða á skipum á sjó. Mér finnst einhvern veginn ekki hægt að líkja því saman þegar menn eru að leggja líf sitt í hættu við að ná fiski úr sjó og hins vegar menn sem eru að sýsla með peninga sem eru í rauninni ekki aflafé þeirra. Þeir fengu til sín sjóði sem eru með bestu tryggingu sem hægt er að hafa; Fiskveiðasjóð, Iðnlánasjóð og fleiri sjóði sem er búið að tryggja í öllum helstu atvinnugreinum þjóðarinnar. Og að segja að þetta sé einhver snilld og þar með sé í sjálfu sér eðlilegt að þessir menn hafi milljónatugi í laun aukreitis umfram það sem þeir hafa samkvæmt venjulegum taxta, mér finnst alveg með ólíkindum að geta borið þetta tvennt saman.
