Hjálmar Jónsson:
Herra forseti. Þótt ljóst væri í hvað stefndi hnykkir manni illa við þegar þær spurnir berast að ekki eru rekstrarforsendur fyrir flugi til Siglufjarðar. Að sjálfsögðu er það öðrum þræði vegna bættra samgangna á landi en nú loksins er komið bundið slitlag þangað alla leið.
Hvað varðar samkeppni í flugi, þá er hún ekki lengur fyrir hendi til Siglufjarðar þannig að ekki eru það undirboð heldur einfaldlega viðskiptalegar forsendur sem hindra flugfélagið Íslandsflug í því að halda áfram fluginu eftir bréfi þeirra.
Flug verður auðvitað að vera reglulegt og lausn þarf að finna á þessu. Þetta er vissulega algerlega óviðunandi. Þess ber þó að geta að styrkir til ferju- og flugsamgangna eru nú teknir af vegafé og þann póst má heldur ekki skerða. Þetta þarf að skoða í víðara samhengi. Þetta er vissulega byggðamál, þetta er stórt byggðamál sem þarf að taka á í heild, móta almennar reglur af hálfu stjórnvalda og þingsins um áætlunarferðir og tryggja fjárveitingu til þess.