[prenta uppsett í dálka] 114. fundur, 125. lþ.
Samgönguráðherra (Sturla Böðvarsson):
Herra forseti. Mér er vissulega ánægja að fá tækifæri til að svara fsp. frá hv. þm. Sighvati Björgvinssyni, ekki síst vegna þess að ég hef fylgst nokkuð með því rannsóknarverkefni sem hér er um að ræða. Menntmrn. bjó hins vegar í mínar hendur svör við fsp. hv. þm.
Í fyrsta lagi var spurt: Hvernig áformar ráðherra að tryggja að lokið verði við Íslandsþáttinn í norræna rannsóknarverkefninu ,,Byggð og tímatal í Norður-Atlantshafi``?
Svarið er svohljóðandi: Það er ekki á ábyrgð menntmrh. að hlutast til um einstaka rannsóknarverkefni. Styrkir til rannsóknarverkefna á verksviði menntmrn. fara í gegnum sjóði Rannsóknaráðs Íslands. Á þessu ári var verkefninu ,,Byggð og tímatal í Norður-Atlantshafi`` veittur 300 þús. kr. styrkur vegna útgáfu á niðurstöðum verkefnisins. Sé verkefninu ólokið hafa íslenskir vísindamenn möguleika á að senda inn umsóknir um styrki í tæknisjóð eða vísindasjóð Rannsóknaráðs Íslands.
Í annan stað var spurt: Er ráðherra reiðubúinn til að beita sér fyrir því að úrvinnslu rannsókna á Íslandsþætti verkefnisins geti lokið á árinu 2000?
Svarið er svohljóðandi: Hvað varðar úrvinnslu á Íslandsþætti verkefnisins er bent á að ósk frá aðstandendum verkefnisins um aðgang að rannsóknargögnum hefur verið beint til Þjóðminjasafns Íslands. Í bréfi til verkefnisstjóra ,,Byggðar og tímatals í Norður-Atlantshafi`` dags. 6. maí 1999, kemur m.a. fram að ráðuneytið hafi óskað eftir því við þjóðminjavörð að aðgangur og afrit af gögnum sem enn hefðu ekki verið afgreidd yrðu send eða afhent verkefnisstjóra. Menntmrh. hlutast ekki til um þær faglegu forsendur sem liggja að baki afgreiðslu slíkra mála. Það er á ábyrgð sérfræðinga Þjóðminjasafnsins.
