[prenta uppsett í dálka] 19. fundur, 127. lþ.
Þuríður Backman (andsvar):
Herra forseti. Mér fannst nú virðulegur þingmaður komast heldur illa frá því að reyna að snúa út úr því sem ég sagði.
Það er mat núverandi stjórnvalda að í Náttúruverndarráði séu öfgafullir náttúruverndarsinnar. Hvers vegna er það? Er það ekki vegna þess að núverandi ríkisstjórn stendur fyrir svo stórfelldum stóriðju- og virkjanaframkvæmdum að þeim síðustu hefur verið hafnað af náttúruverndarsjónarmiðum, að hér eru talsmenn sem styðja ekki þessa aðför að náttúrunni? Og ef samt á að halda áfram, hverjir eiga þá að standa vaktina? Það þarf ekkert að vera öfgafullur í náttúruvernd til þess að láta í sér heyra þegar verið er að deila um virkjanaáform núverandi ríkisstjórnar sem ganga stórlega á náttúruna.
Ég held að við séum hér komin að kjarna málsins. Það á að leggja Náttúruverndarráð niður vegna þess að það hefur staðið sig í hlutverki sínu.
