Frsm. meiri hluta fjárln. (Ólafur Örn Haraldsson) (andsvar):
Virðulegi forseti. Ég fagna því eins og ég gerði áðan að formaður fjárln. skyldi hafður með í ráðum vegna þeirra gjörbreyttu aðstæðna sem eru í ríkisfjármálum. Mér hefði einmitt þótt það síðra og verra ef formaður fjárln. hefði ekki verið hafður með. Með því að hafa formanninn með í að fást við þær gífurlegu breytingar sem eru að verða á okkar efnahagsmálum sýnir ríkisstjórnin, sem leggur þetta frv. fram, að hún ber virðingu fyrir nefndinni. Hún viðurkennir að fjárlögin eru á höndum nefndarinnar og þess vegna var þetta með öllu eðlilegt, viðurkenning á því að það er Alþingi sem ber ábyrgð á frv. og lögunum.
Það er ekki aðeins í þessu efni sem formenn nefnda starfa með þeim sem leggja fram frv. Það er svo í öllum málum hér í þinginu að formenn nefndanna starfa með þeim sem flytja frumvörpin og þess vegna fagna ég því að oddvitar fjárln. voru með í undirbúningsstarfinu sem mun skila sér milli 2. og 3. umr.