Alþingiskosningar 1900
Kjörsókn í þingkosningum árið 1900 var til muna meiri en verið hafði í fyrri alþingiskosningum og er það ugglaust til vitnis um vaxandi áhuga almennings á stjórnmálum. Sem fyrr voru stjórnarskipunarmál og tengsl Íslands og Danmerkur fyrirferðarmest í stjórnmálaumræðunni og að þessu sinni bar hæst tillögur Valtýs Guðmundssonar stjórnmálamanns og prófessors um lausn málsins sem kenndar voru við hann og kölluð valtýska.
Í kosningaskýrslu kemur fram að „atkvæðasmalar“ hafi látið til sín taka við kosningarnar og nú einnig í sveitum landsins þar sem þorri kjósenda var búsettur. Má ætla að vöxtur í kjörsókn hafi að einhverju leyti stafað af atbeina atkvæðasmalanna við að koma kjósendum á kjörfund. Kosningarnar leiddu til verulegrar endurnýjunar þingheims en í þeim voru kjörnir 14 nýir þingmenn sem ekki höfðu áður setið á Alþingi.
Um kosningarnar | |||
Kjördagur / kosningatímabil | September 1900 | ||
Mannfjöldi | 77.967 | ||
Kjósendur á kjörskrá | 7.329 | ||
Hlutfall kosningarbærra af heildarmannfjölda | 9,4% | ||
Greidd atkvæði | 3.573 | ||
Kosningaþátttaka | 48,7% | ||
Hlutfall kjósenda af heildarmannfjölda | 4,6% | ||
Kosningaþátttaka karla | 48,7% | ||
Kosningaþátttaka kvenna | 0% | ||
Kjördæmakjörnir þingmenn | 30 | ||
Konungkjörnir þingmenn | 6 | ||
Heildarfjöldi þingmanna | 36 |
Kjördæmi og þingmenn 1900 |
|
Reykjavík | 1 |
Gullbringu- og Kjósarsýsla | 2 |
Árnessýsla | 2 |
Rangárvallasýsla | 2 |
Vestmannaeyjasýsla | 1 |
Vestur-Skaftafellssýsla | 1 |
Austur-Skaftafellssýsla | 1 |
Suður-Múlasýsla | 2 |
Norður-Múlasýsla | 2 |
Norður-Þingeyjarsýsla | 1 |
Suður-Þingeyjarsýsla | 1 |
Eyjafjarðarsýsla | 2 |
Skagafjarðarsýsla | 2 |
Húnavatnssýsla | 2 |
Strandasýsla | 1 |
Ísafjarðarsýsla | 2 |
Barðastrandarsýsla | 1 |
Dalasýsla | 1 |
Snæfells- og Hnappadalssýsla | 1 |
Mýrasýsla | 1 |
Borgarfjarðarsýsla | 1 |