Ferill 217. máls. Aðrar útgáfur af skjalinu: PDF - Word
157. löggjafarþing 2025–2026.
Þingskjal 260 – 217. mál.
Skýrsla
forsætisráðherra um framkvæmd ályktana Alþingis frá árinu 2024.
Skýrsla þessi er lögð fram í samræmi við fyrirmæli 8. mgr. 45. gr. laga um þingsköp Alþingis, nr. 55/1991. Markmið hennar er að veita Alþingi yfirsýn yfir eftirfylgni framkvæmdarvaldsins með ályktunum þingsins. Til umfjöllunar er framkvæmd þeirra ályktana Alþingis frá árinu 2024 sem kalla á viðbrögð ráðherra eða ríkisstjórnar og meðferð málefna sem þingið hefur vísað til ríkisstjórnar eða einstakra ráðherra á því ári. Þá er hér einnig að finna yfirlit um sömu atriði frá árunum 2021–2023. Undanskilin eru þau málefni þar sem lög kveða á um að haga skuli skýrslugjöf til þingsins á annan hátt.
Umræddar þingsályktanir á árunum 2021–2024 voru samtals 83, þar af 22 vegna staðfestinga ákvarðana sameiginlegu EES-nefndarinnar. Slíkar ályktanir eru reglubundinn þáttur í þinglegri meðferð EES-mála og fela í sér afléttingu á stjórnskipulegum fyrirvara við ákvörðun sem kallar á lagabreytingar á Íslandi. Þær hafa því nokkra sérstöðu miðað við aðrar ályktanir.
Þá vísuðu þingnefndir 11 málum til ríkisstjórnarinnar. Í skýrslu þessari er þannig fjallað um samtals 94 þingmál, sem sum hver varða fleiri en eitt ráðuneyti. Fjöldi þingsályktana á hverju ári sem kalla á viðbrögð ráðherra eða ríkisstjórnar, auk málefna sem þingið vísar þangað í nefndaráliti, sveiflast talsvert eftir árum. Á árinu 2024 eru þetta samtals 15 þingmál, þar af 14 ályktanir og 1 nefndarálit. Árið 2023 voru þingmálin 19, allt þingsályktanir. Á árinu 2022 voru þingmálin 31 talsins, 28 þingsályktanir en 3 nefndarálit. Að lokum voru þingmálin 29 árið 2021, 21 þingsályktanir en 8 nefndarálit.
| Staða framkvæmdar | Framkvæmd lokið | Framkvæmd hafin | Framkvæmd ekki hafin | Samtals |
|---|---|---|---|---|
| 2024 | 6 | 8 | 1 | 15 |
| 2023 | 4 | 15 | 0 | 19 |
| 2022 | 21 | 10 | 0 | 31 |
| 2021 | 20 | 9 | 0 | 29 |
| Samtals | 51 | 42 | 1 | 94 |
Jafnframt er nokkur munur á fjölda þingmála eftir ráðuneytum. Utanríkisráðuneytið hefur á sinni könnu langflest málin, 39 talsins, eða tæpan helming þeirra. Það skýrist af því að stór hluti málanna eru staðfestingar á ákvörðunum sameiginlegu EES-nefndarinnar sem gerðar eru í formi þingsályktana. Öll ráðuneytin koma í einhverjum mæli að framkvæmd þingsályktana þótt ekki sé víst að þau séu með framkvæmd á hendi á hverju ári. Hér á eftir verður gerð grein fyrir tölfræði um þessi atriði, sem endurspeglar flokkun bæði eftir árum og eftir ráðuneytum, sbr. töflur 2–5.
Þingmálin sem hér eru til umfjöllunar eru flokkuð eftir stöðu hvers verkefnis. Greint er á milli verkefna þar sem framkvæmd er lokið, verkefna þar sem framkvæmd er hafin og svo verkefna þar sem framkvæmd er ekki hafin. Þetta er skýrt í tilfellum þeirra verkefna sem annað hvort er búið að ljúka framkvæmd við eða framkvæmd ekki hafin. Í öðrum tilfellum, þar sem framkvæmd er hafin en ekki lokið, geta verkefnin verið mismunandi langt komin. Aftar í skýrslunni er gerð nánari grein fyrir þessu.
| 2024 – staða framkvæmdar eftir ráðuneytum |
Framkvæmd lokið | Framkvæmd hafin | Framkvæmd ekki hafin | Samtals |
|---|---|---|---|---|
| FOR | 0 | 0 | 0 | 0 |
| ATRN | 0 | 1 | 0 | 1 |
| DMR | 0 | 0 | 0 | 0 |
| FRN | 0 | 3 | 0 | 3 |
| FJR | 2 | 0 | 0 | 2 |
| HRN | 0 | 0 | 0 | 0 |
| IRN | 0 | 0 | 0 | 0 |
| MNH | 0 | 2 | 0 | 2 |
| MRN | 0 | 0 | 0 | 0 |
| URN | 0 | 0 | 0 | 0 |
| UTN | 4 | 2 | 1 | 7 |
| Samtals | 6 | 8 | 1 | 15 |
| 2023 – staða framkvæmdar eftir ráðuneytum |
Framkvæmd lokið | Framkvæmd hafin | Framkvæmd ekki hafin | Samtals |
|---|---|---|---|---|
| FOR | 0 | 0 | 0 | 0 |
| ATRN | 0 | 2 | 0 | 2 |
| DMR | 0 | 0 | 0 | 0 |
| FRN | 1 | 2 | 0 | 3 |
| FJR | 1 | 0 | 0 | 1 |
| HRN | 0 | 1 | 0 | 1 |
| IRN | 0 | 1 | 0 | 1 |
| MNH | 0 | 4 | 0 | 4 |
| MRN | 0 | 1 | 0 | 1 |
| URN | 0 | 0 | 0 | 0 |
| UTN | 2 | 4 | 0 | 6 |
| Samtals | 4 | 15 | 0 | 19 |
| 2022 – staða framkvæmdar eftir ráðuneytum |
Framkvæmd lokið | Framkvæmd hafin | Framkvæmd ekki hafin | Samtals |
|---|---|---|---|---|
| FOR | 1 | 2 | 0 | 3 |
| ATRN | 0 | 0 | 0 | 0 |
| DMR | 0 | 1 | 0 | 1 |
| FRN | 0 | 1 | 0 | 1 |
| FJR | 3 | 0 | 0 | 3 |
| HRN | 1 | 1 | 0 | 2 |
| IRN | 0 | 1 | 0 | 1 |
| MNH | 0 | 1 | 0 | 1 |
| MRN | 0 | 0 | 0 | 0 |
| URN | 1 | 0 | 0 | 1 |
| UTN | 15 | 3 | 0 | 18 |
| Samtals | 21 | 10 | 0 | 31 |
| 2021 – staða framkvæmdar eftir ráðuneytum |
Framkvæmd lokið | Framkvæmd hafin | Framkvæmd ekki hafin | Samtals |
|---|---|---|---|---|
| FOR | 1 | 0 | 0 | 1 |
| ATRN | 0 | 1 | 0 | 1 |
| DMR | 0 | 0 | 0 | 0 |
| FRN | 0 | 2 | 0 | 2 |
| FJR | 5 | 0 | 0 | 5 |
| HRN | 0 | 1 | 0 | 1 |
| IRN | 1 | 0 | 0 | 1 |
| MNH | 1 | 0 | 0 | 1 |
| MRN | 1 | 3 | 0 | 4 |
| URN | 4 | 0 | 0 | 4 |
| UTN | 7 | 2 | 0 | 9 |
| Samtals | 20 | 9 | 0 | 29 |
Ef litið er til utanríkisráðuneytisins sérstaklega á árunum fjórum sem eru til skoðunar, 2021–2024, sést að þingsályktanir sem eru til staðfestingar á ákvörðunum sameiginlegu EES-nefndarinnar eru 22 af 40 eða 55%. Hlutfall þessara 22 ályktana af heildarfjölda allra 94 þingsályktananna á þessu tímabili er 23%.
| Þingsályktanir til staðfestingar vegna EES | Aðrar þingsályktanir | Samtals | |
|---|---|---|---|
| 2024 | 2 | 5 | 7 |
| 2023 | 3 | 3 | 6 |
| 2022 | 12 | 6 | 18 |
| 2021 | 5 | 4 | 9 |
| Samtals | 22 | 18 | 40 |
Að síðustu er rétt að gera grein fyrir stöðu, fjölda og framgangi mála í öllum ráðuneytum á umræddu árabili. Framgangur mála er almennt góður en af 94 málum sem hér eru til umfjöllunar er framkvæmd þegar lokið í 51 máli, eða í um 54% tilvika. Í 42 málum er framkvæmd hafin, sem gerir 45%, en aðeins í 1% mála er framkvæmd ekki hafin.
Nánari grein er hér á eftir gerð fyrir framgangi einstakra mála eftir árum annars vegar og ráðuneytum hins vegar. Forsætisráðuneytið aflaði upplýsinga um framangreint frá öllum ráðuneytum í september og október 2025 og svör þeirra fara hér á eftir.
Framkvæmd ályktana Alþingis frá árinu 2024.
Atvinnuvegaráðuneyti.
Þingsályktun 18/154 um ferðamálastefnu og aðgerðaáætlun til ársins 2030.
21. júní 2024, þskj. 1995 á lögþ. 154.
Framkvæmd hafin.
Með stjórnartillögunni var ályktað að fela ríkisstjórninni að vinna að framkvæmd ferðamálastefnu og aðgerðaáætlun til ársins 2030. Ferðaþjónusta hefur á undanförnum árum vaxið hratt og orðið ein af meginstoðum íslensks efnahagslífs. Spáð er áframhaldandi vexti í komum erlendra ferðamanna til landsins. Þessi þróun felur í sér talsverðar áskoranir en jafnframt mikilsverð tækifæri til að stuðla að aukinni hagsæld og jákvæðri byggðaþróun.
Markmið tillögunnar er að íslensk ferðaþjónusta verði leiðandi í sjálfbærri þróun á grunni jafnvægis á milli efnahags-, umhverfis- og samfélagslegra þátta. Rekin verði arðsöm og samkeppnishæf ferðaþjónusta sem starfi í sátt við bæði land og þjóð. Ferðaþjónustan stuðli að bættum lífskjörum og hagsæld á Íslandi og verði ein af grundvallarstoðum íslensks efnahagslífs. Meginmarkmið ferðamálastefnu er að tryggja framtíðarsýn ferðaþjónustu til lengri tíma. Stutt verði við sjálfbærni í ferðaþjónustu á öllum sviðum. Íslensk ferðaþjónusta verði þekkt fyrir gæði og einstaka upplifun.
Með ferðamálastefnunni fylgir aðgerðaáætlun með 43 aðgerðum. Af þeim er fimm lokið, 16 í vinnslu og 22 ekki farnar af stað. Stefnan var unnin í menningar- og viðskiptaráðuneytinu en málefni ferðaþjónustu færðust yfir til atvinnuvegaráðuneytis í mars 2025, þar sem nú er nú unnið að endurskoðun aðgerðaáætlunar og forgangsröðun verkefna.
Fjármála- og efnahagsráðuneyti.
Þingsályktun 20/154 um fjármálaáætlun fyrir árin 2025–2029.
22. júní 2024, þskj. 2061 á 154. lögþ.
Framkvæmd lokið.
Þingsályktun um fjármálaáætlun er lögð fram ár hvert í samræmi við 5. gr. laga um opinber fjármál, nr. 123/2015. Áætlunin er lögð til grundvallar við gerð frumvarps til fjárlaga.
Nefndarálit með frávísunartillögu um frumvarp til laga um kílómetragjald á ökutæki.
12. nóvember 2024, þskj. 359 á 155. lögþ.
Framkvæmd lokið.
Frumvarp til laga um kílómetragjald á ökutæki var lagt fram á 155. löggjafarþingi en náði ekki fram að ganga. Í nefndaráliti meiri hluta efnahags- og viðskiptanefndar kom fram að meiri hlutinn tæki undir markmið hins nýja tekjuöflunarkerfis sem væri að koma á skilvirkara og sanngjarnara gjaldakerfi fyrir eigendur og umráðamenn ökutækja ásamt því að skjóta styrkari stoðum undir tekjuöflun ríkisins. Meiri hlutinn kallaði þó eftir frekari greiningu og auknu samráði við hagsmunaaðila. Frumvarpið fæli í sér umfangsmikla breytingu á gjaldtöku fyrir notkun ökutækja og því væri mikilvægt að það væri undirbyggt með frekara samráði og greiningu og áhrifamati þannig að nýtt kerfi skapaði ekki óæskileg áhrif fyrir almenning og atvinnugreinar.
Frumvarpið var endurflutt á 156. löggjafarþingi að mestu óbreytt en náði ekki fram að ganga. Við endurflutning frumvarpsins var leitast við að skýra nánar tiltekin ákvæði þess, m.a. skráningu á stöðu akstursmælis, virkni hans og áætlun á meðalakstri, m.a. til hagsbóta fyrir almenning og fyrirtæki. Frumvarpið náði ekki fram að ganga.
Í endurfluttu frumvarpi til laga um kílómetragjald á ökutæki á 157. löggjafarþingi er tekið tillit til breytingartillögu meiri hluta efnahags- og viðskiptanefndar Alþingis eins og við á. Í breytingartillögu meiri hlutans er m.a. komið frekar til móts við tiltekin sjónarmið er varða áhrif frumvarpsins á almenning og tilteknar atvinnugreinar. Aukinheldur hefur frekara samráð átt sér stað við hagsmunaaðila um tiltekin atriði frumvarpsins og yfirferð yfir áhrifamat vegna einstakra þátta þess.
Félags- og húsnæðismálaráðuneyti.
Þingsályktun 9/154 um framkvæmdaáætlun í málefnum fatlaðs fólks fyrir árin 2024–2027.
20. mars 2024, þskj. 1297 á 154. lögþ.
Framkvæmd hafin.
Þingsályktunartillaga um framkvæmdaáætlun í málefnum fatlaðs fólks fyrir árin 2024–2027 var samþykkt á 154. löggjafarþingi en skv. lögum um þjónustu við fatlað fólk með langvarandi stuðningsþarfir, nr. 38/2018, ber að leggja fram framkvæmdaáætlun í málefnum fatlaðs fólks á fjögurra ára fresti.
Sumarið 2022 samþykkti ríkisstjórn Íslands að hefja vinnu við gerð landsáætlunar um innleiðingu samnings Sameinuðu þjóðanna um réttindi fatlaðs fólks og tók framkvæmdaáætlunin mið af þeirri ákvörðun. Framkvæmdaáætlunin byggist á þeirri framtíðarsýn og þeim meginreglum sem fram koma í samningum og er henni ætlað að fela í sér skýra framtíðarsýn, kortlagningu, greiningu og mat á kostum í þjónustu og þróun réttinda fatlaðs fólks til að stuðla að farsælli innleiðingu samningsins. Landsáætlun felur í sér safn 60 aðgerða sem skipt er í eftirfarandi flokka: A. Vitundarvakning og fræðsla, B. Aðgengi, C. Sjálfstætt líf, D. Menntun og atvinna, E. Þróun þjónustu, F. Lögfesting. Aðgerðirnar eru á ábyrgð níu ráðuneyta.
Verkefnastjórn, undir forystu félags- og húsnæðismálaráðuneytis, er ætlað að fylgjast með framvindu áætlunarinnar. Í verkefnastjórn eiga sæti fulltrúar dómsmálaráðuneytis, fjármála- og efnahagsráðuneytis, forsætisráðuneytis, fötlunarfræði í Háskóla Íslands, Geðhjálpar, heilbrigðisráðuneytis, innviðaráðuneytis, landssamtakanna Þroskahjálpar, mennta- og barnamálaráðuneytis, Sambands íslenskra sveitarfélaga og ÖBÍ réttindasamtaka. Í árslok 2024 voru 19 aðgerðir af 60 hafnar, 20 aðgerðir voru í undirbúningi og einni aðgerð var lokið. Aðrar aðgerðir eru á áætlun áranna 2025–2027 og því ekki hafnar.
Þingsályktun 16/154 um landsskipulagsstefnu fyrir árin 2024–2038 ásamt fimm ára aðgerðaáætlun fyrir árin 2024–2028.
16. maí 2024, þskj. 1724 á 154. lögþ.
Framkvæmd hafin.
Þingsályktunartillaga um landsskipulagsstefnu fyrir árin 2024–2038 ásamt fimm ára aðgerðaráætlun fyrir árin 2024–2028 var samþykkt á Alþingi vorið 2024. Tillagan var lögð fram af þáverandi innviðaráðherra. Var þetta í annað sinn sem landsskipulagsstefna var samþykkt en hún leysti af hólmi Landsskipulagsstefnu 2015–2026 sem tók gildi árið 2016, þá fyrsta heildstæða stefna um skipulagsmál á landsvísu. Landsskipulagsstefna felur í sér samræmda stefnu ríkisins í skipulagsmálum fyrir landið í heild og tekur til landsins alls og haf- og strandsvæða. Í þingsályktun um landsskipulagsstefnu eru sett fram þrjú markmið stjórnvalda í skipulagsmálum: um vernd umhverfis og náttúru, velsæld samfélags og samkeppnishæft atvinnulíf. Undir hverju markmiði koma fram áherslur ásamt tilmælum um hvernig beri að framfylgja stefnunni, sem ýmist eiga við um skipulag á miðhálendi, í dreifbýli, í þéttbýli og á haf- og strandsvæðum.
Landsskipulagsstefnu er fyrst og fremst framfylgt með skipulagsgerð sveitarfélaga, sem skulu samkvæmt skipulagslögum byggja á stefnunni við gerð skipulagsáætlana. Auk þess er sett fram aðgerðaráætlun þar sem lagðar eru fram 20 aðgerðir sem tengdar eru áherslum stefnunnar og er ætlað að ná fram markmiðum hennar. Aðgerðirnar miða einkum að því að gera skipulagsgerð sveitarfélaga skilvirkari með bættu aðgengi að grunngögnum og leiðbeiningum, tryggja heildarhagsmuni við gerð skipulagsáætlana sveitarfélaga og stuðla að sjálfbærri þróun þar sem tekið er mið af mögulegum áhrifum loftslagsbreytinga á samfélög og innviði. Vinna er hafin við fimm aðgerðir.
Þingsályktun 21/154 um húsnæðisstefnu fyrir árin 2024–2038 ásamt fimm ára aðgerðaáætlun fyrir árin 2024–2028.
22. júní 2024, þskj. 2101 á 154. lögþ.
Framkvæmd hafin.
Þingsályktunartillaga um húsnæðisstefnu fyrir árin 2024–2038 ásamt fimm ára aðgerðaáætlun fyrir árin 2024–2028 var lögð fram af innviðaráðherra og samþykkt á Alþingi sumarið 2024. Var það í fyrsta sinn sem sett hafði verið fram heildstæð langtímastefna í húsnæðismálum á landsvísu.
Húsnæðisstefnan byggist á eftirfarandi framtíðarsýn: „Stöðugleiki ríki á húsnæðismarkaði þar sem fjölbreytt framboð íbúða mætir þörf í jafnvægi við umhverfið. Öllum er tryggt öruggt og gott húsnæði í blandaðri byggð og húsnæðiskostnaður þeirra er viðráðanlegur.“ Markmið húsnæðisstefnu eru fjórþætt: jafnvægi á húsnæðismarkaði, skilvirkari stjórnsýsla og gæði íbúða í jafnvægi við umhverfið, húsnæðisöryggi og jafnrétti landsmanna í húsnæðismálum og að framboð íbúða stuðli að virkum vinnumarkaði um land allt. Í fimm ára aðgerðaáætlun húsnæðisstefnu fyrir 2024–2028 voru settar fram 46 aðgerðir. 24 aðgerðir eru í vinnslu og er átta aðgerðum þegar lokið. Vinna stendur nú yfir við endurskoðun húsnæðisstefnu en skv. 1. mgr. 3. gr. laga nr. 30/2023, um stefnur og aðgerðaáætlanir á sviði húsnæðis- og skipulagsmála, samgangna og byggðamála, skal ráðherra leggja fram á Alþingi á hverju kjörtímabili tillögu til þingsályktunar um húsnæðisstefnu.
Menningar-, nýsköpunar- og háskólaráðuneyti.
Málstefna íslensks táknmáls 2024−2027 og aðgerðaáætlun.
20. mars 2024, þskj. 1298 á 154. lögþ.
Framkvæmd hafin.
Tillaga til þingsályktunar um málstefnu íslensks táknmáls 2024–2027 og aðgerðaáætlun byggir á tillögum starfshóps sem mennta- og menningarmálaráðherra skipaði í janúar 2020. Starfshópinn skipuðu fulltrúar Málnefndar um íslenskt táknmál, Félags heyrnarlausra og Samskiptamiðstöðvar heyrnarlausra og heyrnarskertra með víðtæku samstarfi við sérfræðinga í málaflokknum. Meginstoðir málstefnunnar eru máltaka barna, rannsóknir og varðveisla, jákvætt viðhorf, fjölgun umdæma íslensks táknmáls, lagaumhverfi og máltækni. Í meðfylgjandi töflu má sjá framgang aðgerðaáætlunar málstefnunnar:
| Aðgerðir | Staða | |
|---|---|---|
| A1 | Snemmtæk íhlutun fyrir börn og fjölskyldur | Framkvæmd hafin |
| A2 | Samþætting þjónustu í þágu farsældar táknmálsbarna | Framkvæmd hafin |
| A3 | Markvisst eftirlit með námi og kennslu táknmálsbarna í leik-, grunn- og framhaldsskólum | Framkvæmd hafin |
| A4 | Endurskoðun aðalnámskrár til að styrkja stöðu íslensks táknmáls | Framkvæmd ekki hafin |
| A5 | Nám í kennslufræði táknmáls við Háskóla Íslands | Framkvæmd hafin |
| A6 | Upplýsingar og gjaldfrjáls ráðgjöf um máltöku | Framkvæmd hafin |
| A7 | Gjaldfrjálsa ráðgjöf fyrir leik- og grunnskóla | Framkvæmd hafin |
| A8 | Markviss aðlögun táknmálsbarna að tákmálssamfélagi | Framkvæmd hafin |
| A9 | Færnimat í íslensku táknmáli á grundvelli evrópskra staðla | Framkvæmd ekki hafin |
| A10 | Táknmálstalandi nemendur í leik-, grunn- og framhaldsskólum njóti náms og kennslu við hæfi | Framkvæmd hafin |
| A11 | Fræðsluefni um íslenskt táknmál | Framkvæmd ekki hafin |
| A12 | Menningarsjóðir aðgengilegir vegna útgáfu táknmálsefnis | Framkvæmd hafin |
| A13 | Almenningur hafi aðgengi að táknmálsnámi hjá Samskiptamiðstöð heyrnarlausra og heyrnarskertra | Framkvæmd hafin |
| B1 | Verkefnaáætlun fyrir málheild um íslenskt táknmál | Framkvæmd hafin |
| B2 | Rannsóknir á íslensku táknmáli og miðlun þeirra | Framkvæmd hafin |
| B3 | Aðgengi að upptökum á SignWiki | Framkvæmd hafin |
| C1 | Upplýsingar og viðburðir á íslensku táknmáli | Framkvæmd hafin |
| C2 | Foreldrar táknmálsbarna fái faglega ráðgjöf og fræðslu um íslenskt táknmál | Framkvæmd hafin |
| C3 | Upplýsingar um réttindi tengd íslensku táknmáli verði aðgengilegar á vefjum | Framkvæmd hafin |
| C4 | Reglulegir viðburðir um íslenskt táknmál | Framkvæmd hafin |
| C5 | Fræðsla um íslenskt táknmál og sögu og menningu þess hluti af námsefni grunnskólabarna | |
| C6 | Jákvætt viðhorf til íslensks táknmáls til stuðnings stefnuaðgerðum stjórnvalda | Framkvæmd ekki hafin |
| C7 | Dagur íslenska táknmálsins 11. febrúar | Framkvæmd hafin |
| D1 | Þýðingar úr íslensku yfir á íslenskt táknmál og öfugt | Framkvæmd hafin |
| D2 | Endurmenntun táknmálstúlka verði tryggð og sérhæfing | Framkvæmd ekki hafin |
| D3 | Táknmálstalandi fólk hafi möguleika á að birta eigin sögur eða annað listrænt efni | Framkvæmd hafin |
| D4 | Aukið aðgengi efnis og fræðslu á íslensku táknmáli | Framkvæmd hafin |
| E1 | Endurskoðun laga um Samskiptamiðstöð heyrnarlausra og heyrnarskertra | Framkvæmd ekki hafin |
| E2 | Lög um stöðu íslenskrar tungu og íslensks táknmáls metin í samræmi við málstefnu | Framkvæmd ekki hafin |
| F1 | Þróun umhverfis til fjarnáms og fjarkennslu íslensks táknmáls | Framkvæmd hafin |
| F2 | Áframhaldandi söfnun málfanga | Framkvæmd hafin |
| F3 | Táknmálstalandi fólk menntað og þjálfað í tækni sem notuð er til að byggja upp málheild íslensks táknmáls | Framkvæmd ekki hafin |
Aðgerðaáætlun í málefnum íslenskrar tungu fyrir árin 2024−2026.
8. maí 2024, þskj. 1664 á 154. lögþ.
Framkvæmd hafin.
Þingsályktun um aðgerðaáætlun í málefnum íslenskrar tungu fyrir árin 2024–2026 var afrakstur af vinnu ráðherranefndar um íslenska tungu sem komið var á fót að tillögu forsætisráðherra í nóvember 2022. Breytingar á skipan Stjórnarráðsins hafði gert það að verkum að málefni íslenskrar tungu voru dreifð á nokkur ráðuneyti og nauðsynlegt þótti að samhæfa aðgerðir stjórnvalda á þessu sviði. Í ráðherranefndinni sátu, auk forsætisráðherra, menningar- og viðskiptaráðherra, mennta- og barnamálaráðherra, félags- og vinnumarkaðsráðherra og háskóla-, iðnaðar- og nýsköpunarráðherra. Ráðherranefndin starfar ekki lengur.
Þingsályktunin samanstendur af 22 aðgerðum sem féllu á ábyrgðarsvið fjögurra ráðuneyta auk einnar stofnunar. Eftir breytingu á skipan ráðuneyta bera tvö ráðuneyti, menningar-, nýsköpunar- og háskólaráðuneyti og mennta- og barnamálaráðuneyti, nú ábyrgð á öllum aðgerðum nema einni. Ábyrgð á aðgerð 11 er hjá Árnastofnun.
| Aðgerðir | Staða |
|---|---|
| 1. Þekkingaröflun og ráðgjöf | Framkvæmd hafin |
| 2. Starfstengt íslenskunám fyrir innflytjendur samhliða vinnu | Framkvæmd hafin |
| 3. Bætt gæði íslenskukennslu fyrir innflytjendur | Framkvæmd hafin |
| 4. Virkjun Samevrópska tungumálarammans | Framkvæmd hafin |
| 5. Fjarnám í íslensku á BA-stigi | Framkvæmd hafin |
| 6. Sameiginlegt fjarnám í íslensku sem öðru máli | Framkvæmd lokið |
| 7. Háskólabrú fyrir innflytjendur | Framkvæmd lokið |
| 8. Viðhorf til íslensku | Framkvæmd hafin |
| 9. Mikilvægi lista og menningar | Framkvæmd hafin |
| 10. Aukin talsetning og textun á íslensku | Framkvæmd hafin |
| 11. Íslenskugátt | Framkvæmd hafin |
| 12. Öflug skólasöfn | Framkvæmd ekki hafin |
| 13. Vefgátt fyrir rafræn námsgögn | Framkvæmd hafin |
| 14. Samræmt verklag um móttöku, kennslu og þjónustu | Framkvæmd hafin |
| 15. Efling íslenskuhæfni starfsfólks í leik- og grunnskólum og frístundastarfi | Framkvæmd hafin |
| 16. Samþætting íslensku og erlendra móðurmála á fagtengdum grunnnámskeiðum starfsfólks í heilbrigðis-, félags- og umönnunargreinum | Framkvæmd hafin |
| 17. Framtíð máltækni | Framkvæmd hafin |
| 18. Íslenska handa öllum | Framkvæmd ekki hafin |
| 19. Íslenska er sjálfsagt mál | Framkvæmd hafin |
| 20. Starfsþróun og hæfni þeirra sem kenna íslensku sem annað mál | Framkvæmd ekki hafin |
| 21. Fræðsla um máltöku og málþroska barna | Framkvæmd hafin |
| 22. Fræðsla og ráðgjöf handa innflytjendum þegar börn þeirra hefja skólagöngu í íslenskum skólum | Framkvæmd hafin |
Utanríkisráðuneyti.
Fullgilding fríverslunarsamnings milli EFTA-ríkjanna og Moldóvu.
13. febrúar 2024, þskj. 1043 á 154. lögþ.
Framkvæmd lokið.
Ísland tilkynnti vörsluaðila fríverslunarsamnings EFTA-ríkjanna og Moldóvu þann 15. apríl 2024 um lok innlends fullgildingarferlis samningsins. Samningurinn tók gildi milli Íslands og Moldóvu þann 1. september 2024.
Stefna um stuðning Íslands við Úkraínu 2024–2028.
29. apríl 2024, þskj. 1601 á 154. lögþ.
Framkvæmd hafin.
Þingsályktunartillagan var lögð fram af utanríkisráðherra og samþykkt með breiðum stuðningi Alþingis 29. apríl 2024. Samkvæmt ályktuninni leggja stjórnvöld áherslu á fimm þætti í stefnu um stuðning við Úkraínu: 1) Öflugt tvíhliða samstarf og samskipti við stjórnvöld, þjóðþing, stofnanir, félagasamtök og atvinnulíf. 2) Virka þátttöku í alþjóðlegu samstarfi og málafylgju sem styðji við örugga, sjálfstæða, fullvalda og lýðræðislega Úkraínu í samræmi við vilja íbúa landsins, auk friðarferlis forseta Úkraínu og ábyrgðarskyldu Rússlands vegna áhrifa stríðsins. 3) Stuðning við varnarbaráttu Úkraínu til að tryggja öryggi borgara og mikilvægra innviða. 4) Mannúðaraðstoð við íbúa Úkraínu og vernd óbreyttra borgara í átökum. 5) Viðhald grunnþjónustu og efnahags Úkraínu meðan á átökum stendur og stuðning við endurreisn og uppbyggingu eftir að þeim lýkur.
Tvíhliða samstarf og diplómatísk samskipti Íslands og Úkraínu hafa styrkst á undanförnum misserum. Hinn 31. maí 2024 undirrituðu þáverandi forsætisráðherra og Volodómír Selenskí, forseti Úkraínu, tvíhliða samning um stuðning Íslands við Úkraínu í samræmi við þingsályktun Alþingis. Úkraínuforseti heimsótti Ísland í október 2024 þar sem hann átti fund með þáverandi forsætisráðherra og utanríkisráðherra og sótti forseta Íslands heim á Bessastaði. Þá fundaði hann með utanríkismálanefnd og ávarpaði Norðurlandaráðsþing. Meðan á heimsókninni stóð var fjórði leiðtogafundur Norðurlandanna og Úkraínu haldinn á Þingvöllum.
Fyrsta embættisferð utanríkisráðherra var heimsókn til Úkraínu í janúar 2025 þar sem samstaða Íslands með Úkraínu og áframhaldandi stuðningur var áréttaður. Forsætisráðherra heimsótti Kænugarð í febrúar þar sem haldinn var leiðtogafundur í tilefni þess að þrjú ár voru liðin frá allsherjarinnrás Rússlands. Forseti Alþingis heimsótti Úkraínu í mars og tók þátt í viðburðum til minningar um fórnarlömb grimmdarverka rússneska innrásarhersins í Bútsja.
Sendiráð Íslands í Varsjá sinnir sendiráðsstörfum gagnvart Úkraínu. Sendiherra ferðast reglulega til Úkraínu, sinnir tengslum við þarlend stjórnvöld og tekur þátt í viðburðum og pólitísku samstarfi í hópi samstarfsríkja Úkraínu.
Íslensk stjórnvöld sinna virkri málafylgju til stuðnings Úkraínu, ýmist með eigin málflutningi eða í samstarfi við önnur ríki, oftast með Norðurlöndunum og Eystrasaltsríkjunum. Rík áhersla er lögð á málflutning á vettvangi alþjóðastofnana, svo sem hjá Sameinuðu þjóðunum, Öryggis- og samvinnustofnun Evrópu, Evrópuráðinu og Atlantshafsbandalaginu. Hefur Ísland átt aðild að fjölda yfirlýsinga síðustu tvö ár þar sem undirstrikuð er samstaða með Úkraínu og áréttaður staðfastur stuðningur við varnarbaráttu landsins.
Stuðningur Íslands við Úkraínu er einnig undirstrikaður með innleiðingu allra þvingunaraðgerða ESB gagnvart Rússlandi vegna innrásarstríðsins.
Heildarframlög íslenskra stjórnvalda vegna Úkraínu á tímabilinu 2024–2028 taka mið af stuðningi annarra ríkja Norðurlandanna. Heildarstuðningur Íslands frá 24. febrúar 2022 til 18. september 2025 nemur samtals 13,3 milljörðum króna. Varnartengdur stuðningur nemur 7,3 milljörðum króna og mannúðar- og efnahagsstuðningur 6 milljörðum króna. Á grundvelli þingsályktunarinnar hefur stuðningur Íslands farið stigvaxandi. Þannig nam heildarstuðningur 2,2 milljörðum króna árið 2022, 3,4 milljörðum króna árið 2023 og 3,7 milljörðum króna árið 2024. Áætlanir gera ráð fyrir að á yfirstandandi ári muni stuðningurinn nema 5,7 milljörðum króna sem skiptist í 2,1 milljarð króna vegna mannúðar- og efnahagsstuðnings og 3,6 milljarða króna vegna varnartengds stuðnings
Hvað mannúðar- og efnahagsstuðning varðar er tekið mið af þingsályktun um stefnu um alþjóðlega þróunarsamvinnu Íslands fyrir árin 2024–2028, nr. 5/154, og þörfum og áherslum úkraínskra stjórnvalda. Lögð er áhersla á vel skilgreind málefnasvið og samstarfsaðila til að hámarka áhrif framlaganna og þarfir hverju sinni. Málefnasvið sem Ísland hefur reynslu af og þekkingu eru sett í forgang og sérstaklega litið til grunnþarfa, styrkingar félagslegra og borgaralegra innviða, þar á meðal á sviði menntamála, orkuöryggis og orkuskipta, lýðræðis og bættra stjórnarhátta, mannréttinda og kynjajafnréttis, einkum verkefna sem styðja við markmið ályktunar Sameinuðu þjóðanna um konur, frið og öryggi.
Ísland styður dyggilega við Úkraínu með varnartengdum stuðningi á grundvelli þingsályktunar Alþingis. Líkt og þar kemur fram er þunginn í varnartengdum stuðningi framlög í fjölþjóðlega sjóði sem kaupa hergögn og birgðir og tvíhliða verkefni sem grundvallast á beiðnum úkraínskra stjórnvalda. Einn helsti vettvangur samstarfs um varnartengdan stuðning hefur verið hópur rúmlega fimmtíu ríkja, Ukraine Defence Contact Group (UDCG), sem undir forystu Bandaríkjanna, og nú Bretlands, hefur unnið ötullega að því að útvega hergögn, þjálfun og margvíslegan búnað. Ísland hefur tekið virkan þátt í starfi ríkjahópsins og brugðist við óskum og þörfum úkraínskra stjórnvalda.
Allsherjarþing Sameinuðu þjóðanna ályktaði þann 14. nóvember 2022 að Rússland beri ábyrgð á árás inn í Úkraínu og hafi með því brotið alþjóðalög. Jafnframt var ályktað um að komið yrði á fót alþjóðlegu skaðabótakerfi og var samstaða um að ábyrgð Rússlands á innrásinni væri lykilatriði ef tryggja ætti réttlátan og varanlegan frið í Úkraínu. Ísland hefur tekið þátt í alþjóðlegu samstarfi á þessu sviði sem miðað hefur að því að setja á laggirnar þrjár stoðir í alþjóðlegri ábyrgðarskyldu Rússlands. Grunnurinn var lagður með stofnun tjónaskrár á leiðtogafundi Evrópuráðsins í Reykjavík í maí 2023. Önnur stoðin er alþjóðlega skaðabótanefndin, en samningaviðræðum um hana lauk í byrjun september síðastliðinn. Þriðja stoðin er sérstakur dómstóll vegna glæpa gegn friði í Úkraínu. Samningur um stofnun dómstólsins var undirritaður í maí 2025 af forseta Úkraínu og framkvæmdastjóra Evrópuráðsins og býðst aðildarríkjum Evrópuráðsins og ríkjum utan þess að gerast aðilar. Þátttaka Íslands í dómstólnum er í undirbúningi.
Uppfærður fríverslunarsamningur EFTA-ríkjanna og Úkraínu var undirritaður 8. apríl 2025. Tillaga til þingsályktunar um fullgildingu samningsins verður lögð fyrir 157. löggjafarþing.
Ákvarðanir nr. 185/2023 um breytingu á IX. viðauka og nr. 240/2023 um breytingu á XI. viðauka við EES-samninginn (Fjármálaþjónusta o.fl.).
30. apríl 2024, þskj. 1609 á 154. lögþ.
Framkvæmd hafin.
Ísland tilkynnti um uppfyllingu stjórnskipulegra skilyrða, sbr. 104. gr. EES-samningsins, hinn 12. júní 2024 vegna ákvörðunar nr. 185/2023 og tók ákvörðunin gildi 1. ágúst 2024. Ísland tilkynnti um uppfyllingu stjórnskipulegra skilyrða vegna ákvörðunar nr. 240/2023 hinn 12. júní 2024. Noregur hefur ekki aflétt stjórnskipulegum fyrirvara og hefur ákvörðunin því ekki öðlast gildi.
Þingsályktun 14/154 um framfylgd ályktana Vestnorræna ráðsins árið 2023.
30. apríl 2024, þskj. 1613 á 154. lögþ.
Framkvæmd ekki hafin.
Alþingi skoraði með ályktuninni á ríkisstjórnina að vinna að framkvæmd fjögurra ályktana Vestnorræna ráðsins sem samþykktar voru á ársfundi ráðsins 29.–30. ágúst 2023. Ályktanirnar eru ólíkar og tengjast málefnasviðum margra ráðuneyta og einhverjar þeirra kunna að krefjast samstarfs fleiri aðila.
Í fyrstu ályktuninni, nr. 1/2023, eru leiðtogar ríkisstjórna og þjóðþinga landanna þriggja hvattir til að útbúa heildræna áætlun um það hvernig vestnorrænu löndin geta unnið saman og staðið vörð um hafið sem matarkistu okkar og þannig komið í veg fyrir að auðlindir fari til spillis og um leið tryggt fæðuöryggi. Ríkisstjórnir Vestur-Norðurlandanna eru þar hvattar til að bregðast við mengun, tryggja að norðurskautið verði áfram lágspennusvæði og vernda líffræðilegan fjölbreytileika og vistkerfi hafsins. Í annarri ályktuninni, nr. 2/2023, eru ríkisstjórnir landanna hvattar til að kanna möguleika á að koma á sameiginlegum vestnorrænum næringarráðleggingum. Hér á landi hefur vinna við vestnorrænar næringarráðleggingar hefur ekki farið af stað en heilbrigðisráðuneytið og embætti Landlæknis taka þátt í samstarfi um norrænar næringarráðleggingar á vegum Norrænu ráðherranefndarinnar. Í þriðju ályktuninni, nr. 3/2023, eru vestnorrænir umhverfisráðherrar hvattir til að halda fund og skiptast á reynslu og hugmyndum um hvernig löndin geti dregið úr matarsóun og aukið matvælaöryggi á Vestur-Norðurlöndum. Umhverfis-, orku- og loftslagsráðuneytið liti það jákvæðum augum ef matarsóun yrði rædd á fundi vestnorrænu umhverfisráðherranna en enn hefur þó ekki orðið af slíkum fundi.
Í fjórðu og síðustu ályktuninni, nr. 4/2023, eru stjórnvöld hvött til að kanna möguleika á auknu samstarfi í tengslum við lýðskóla (d. efterskole) og athuga hvort nemendur slíkra skóla geti sótt styrk til uppihalds á meðan á slíku námi stendur. Með lýðskóla er þar átt við skólastig fyrir nemendur á aldrinum 14–18 ára. Á Grænlandi og í Færeyjum er algengt að ungt fólk á aldrinum 14–18 ára sæki lýðskóla. Samkvæmt íslenskum lögum um lýðskóla, nr. 65/2019, skulu nemendur við lýðskóla á Íslandi hafa náð 18 ára aldri er þeir hefja nám við lýðskóla og er því er að mati mennta- og barnamálaráðuneytisins ekki hægt að auka samstarf um þetta skólastig á meðan það er skilgreint svo ólíkt milli landa.
Utanríkisráðuneytið hefur umsýslu með framfylgd ályktana Vestnorræna ráðsins og mun halda áfram að safna upplýsingum um gang mála hjá fagráðuneytum sem að málunum koma og upplýsa Vestnorræna ráðið um hvort og hvað hefur verið gert vegna þeirra.
Fiskveiðiviðræður milli Íslands og Grænlands varðandi aðgang til makrílveiða á Norðaustur-Atlantshafi á árinu 2024.
16. maí 2024, þskj. 1725 á 154. lögþ.
Framkvæmd lokið.
Sem hluti af samningaviðræðum Íslands og Grænlands um loðnu og gullkarfa fóru fram viðræður um aðgang til makrílveiða. Sameiginlega bókunin um makrílveiðar var undirrituð 18. desember 2023 og fól í sér gagnkvæmar aðgangsheimildir til makrílveiða.
Staðfesting rammasamkomulags milli Íslands og Grænlands um verndun loðnustofnsins og stjórnun veiða úr honum.
21. júní 2024, þskj. 1996 á 154. lögþ.
Framkvæmd lokið.
Samkomulag sneri að langtímaveiðistjórnun loðnustofnsins á hafsvæðinu milli Austur-Grænlands, Íslands og Jan Mayen og var staðfest af forseta Íslands 26. júní 2024. Samningurinn er ótímabundinn og gildir því samkvæmt efni sínu um fiskveiðar úr loðnustofninum þar til hann verður endurskoðaður eða sagt upp af samningsaðilum.
Staðfesting ákvarðana sameiginlegu EES-nefndarinnar um breytingar á IX. viðauka við EES-samninginn (Fjármálaþjónusta o.fl.).
14. nóvember 2024, þskj. 366 á 155. lögþ.
Framkvæmd lokið.
Með þingsályktuninni heimilaði Alþingi ríkisstjórninni að staðfesta þrjár fyrirhugaðar ákvarðanir sameiginlegu EES-nefndarinnar um breytingar á IX. viðauka (fjármálaþjónusta) við EES-samninginn. Ákvörðun nr. 291/2024 öðlaðist gildi 1. apríl 2025, ákvörðun nr. 268/2023 öðlaðist gildi 24. júní 2025 og ákvörðun nr. 40/2025 öðlaðist gildi 1. júlí 2025.
Yfirlit yfir framkvæmd ályktana Alþingis frá árinu 2023.
Atvinnuvegaráðuneyti.
Þingsályktun 20/153 um matvælastefnu til ársins 2040.
31. maí 2023, þskj. 1913 á 153. lögþ.
Framkvæmd hafin.
Með stjórnartillögunni var ályktað að unnið yrði samkvæmt matvælastefnu til ársins 2040. Matvælastefna Íslands verði leiðandi í ákvarðanatöku til að stuðla að aukinni verðmætasköpun í matvælaframleiðslu hér á landi, tryggja fæðu- og matvælaöryggi og auka velferð fólks í sátt við umhverfi og náttúru. Matvælastefnunni er ætlað að vera leiðarstef fyrir matvælaframleiðslu í landinu og þar með talið þá stefnumótun sem undir hana fellur. Stefnan verður höfð til hliðsjónar við stefnumótun í landbúnaði, sjávarútvegi og fiskeldi.
Á Íslandi er framleitt mikið magn matvæla og er framleiðslan mikilvæg með tilliti til allra lykilhagstærða svo sem landsframleiðslu, útflutningsverðmæta og fjölda starfa. Fá samfélög sem við berum okkur saman við eru jafn efnahagslega háð matvælaframleiðslu. Ísland er ríkt af auðlindum sem gerir landið að samkeppnishæfum matvælaframleiðanda innanlands sem og á alþjóðamörkuðum. Forsendur eru fyrir hendi að byggja velsæld þjóðarinnar áfram á sjálfbærri nýtingu auðlinda, m.a. til matvælaframleiðslu, og jafnframt að þróa áfram nýjar framleiðslugreinar á þeim grunni.
Matvælastefnan sem hér var mörkuð nær til ársins 2040. Horft var til helstu áskorana og tækifæra í matvælaframleiðslu. Þegar drög matvælastefnunnar lágu fyrir var haldið matvælaþing sem opið var öllum áhugasömum og sýnt í opnu streymi. Þar voru fengnir aðilar úr öllum áttum til að ræða og gagnrýna stefnuna í heild sinni auk þess sem opið var fyrir spurningar. Umræður og athugasemdir frá matvælaþingi voru hafðar að leiðarljósi við lokafrágang matvælastefnu. Í stefnunni kemur fram metnaðarfull framtíðarsýn. Til þess að sú framtíðarsýn verði að veruleika verður lögð áhersla á sjálfbærni matvælaframleiðslu, samfélag, fæðuöryggi, matvælaöryggi, þarfir neytenda og rannsóknir, nýsköpun og menntun.
Stefnunni fylgir aðgerðaáætlun og er hún samantekt úr stefnumótun sem undir hana fellur, ásamt aðgerðum sem ná til þeirra málaflokka sem eru á ábyrgð ráðuneytisins. Í aðgerðaáætluninni eru settar fram fimm aðgerðir sem liggja þvert á aðrar undirstefnur og er þeim ýmist lokið eða langt á veg komnar.
Þingsályktun 21/153 um um landbúnaðarstefnu til ársins 2040.
1. júní 2023, þskj. 1930 á 153. lögþ.
Framkvæmd hafin.
Með stjórnartillögunni var ályktað að unnið yrði eftir heildstæðri landbúnaðarstefnu fyrir Ísland til ársins 2040. Meginmarkmið landbúnaðarstefnunnar er að efla og styðja íslenskan landbúnað og styrkja stoðir hans til framtíðar með sjálfbæra þróun að leiðarljósi. Framleiðsla landbúnaðarafurða varðar samfélagið allt og er stefnunni ætlað að skapa sterkar stoðir fyrir innlenda landbúnaðarframleiðslu til framtíðar til hagsbóta fyrir samfélagið í heild. Landbúnaðarstefnan byggist á þremur lykilbreytum sem talið er að munu hafa mikil áhrif á þróun landbúnaðar á komandi árum, þ.e. 1) landnýtingu, 2) loftslagsmálum og umhverfisvernd og 3) tækni og nýsköpun. Þessar þrjár breytur setja sterkan svip á þau tíu áhersluatriði sem dregin eru fram í tillögunni. Í tillögunni er sett fram metnaðarfull framtíðarsýn sem snertir umgjörð landbúnaðar í heild sinni og tekur til umhverfis, samfélags og samkeppnishæfni þess starfsvettvangs sem framleiðsla landbúnaðarafurða er.
Í stefnunni kemur fram að gerð verði aðgerðaráætlun til fimm ára í kjölfar samþykktar þingsályktunartillögunnar. Aðgerðaáætlun landbúnaðarstefnu til fimm ára var gefin út þann 24. september 2024. Áætluninni er ætlað að ná yfir þau verkefni landbúnaðarstefnunnar sem eru á forræði atvinnuvegaráðuneytisins (áður matvælaráðuneytisins) og verða í forgangi á tímabilinu. Aðgerðirnar eru ekki settar fram í forgangsröðun heldur er uppröðun aðgerðanna í samræmi við uppbyggingu landbúnaðarstefnunnar sjálfrar. Við gerð aðgerðaáætlunarinnar var lögð áhersla á að setja fram afmarkaðar og tímasettar aðgerðir sem raunhæft má telja að komist í framkvæmd á því tímabili sem áætlunin nær yfir. Tillögur að nýjum aðgerðum verða teknar til frekari skoðunar við endurskoðun áætlunarinnar. Í aðgerðaáætluninni eru settar fram 28 aðgerðir og þar af er tveimur aðgerðum lokið og 21 aðgerð í framkvæmd eða í undirbúningi.
Félags- og húsnæðismálaráðuneyti.
Þingsályktun 10/153 um aukið aðgengi að hjálpartækjum fyrir blinda, sjónskerta og einstaklinga með samþætta sjón- og heyrnarskerðingu.
23. mars 2023, þskj. 1382 á 153. lögþ.
Framkvæmd lokið.
Með þingsályktuninni ályktaði Alþingi að ríkistjórninni yrði falið að auka aðgengi að hjálpartækjum fyrir blinda, sjónskerta og einstaklinga með samþætta sjón- og heyrnarskerðingu með úthlutun nýrra hjálpartækja. Í því skyni var ákveðið að veita 70 millj.kr. til Þjónustu- og þekkingarmiðstöðvar fyrir blinda, sjónskerta og einstaklinga með samþætta sjón- og heyrnarskerðingu, nú Sjónstöðvarinnar, á árunum 2024 og 2025 til kaupa á hjálpartækjum í samræmi við lög um stofnunina og reglugerð um úthlutun hjálpartækja. Tilefni þingsályktunar var ör þróun tæknilausna fyrir blinda og sjónskerta og þörf á aukinni fjárveitingu til kaupa á uppfærðum sjónhjálpartækjum. Umrædd hjálpartæki eru dýr en gjörbreyta aðstæðum blindra og sjónskertra og auka lífsgæði þessa hóps til muna.
Aukið framboð hjálpartækja fer saman við aðgerð C4 í landsáætlun um innleiðingu samnings Sameinuðu þjóðanna um réttindi fatlaðs fólks sem samþykkt var á Alþingi í mars 2024. Fjárveitingin hefur gert stofnuninni mögulegt að kaupa og úthluta mikilvægum hjálpartækjum þ.m.t. höfuðbornum stækkunartækjum, nýrri tegund borðstækkunartækja og punktaletursskjáa, umferlistækja og skanna með íslenskum talgervli. Mikil ánægja er meðal notenda með öll framangreind hjálpartæki sem hafa í flestum tilvikum aukið lífsgæði framangreinds hóps til muna.
Þingsályktun 13/153 um aðgerðaáætlun um þjónustu við eldra fólk fyrir árin 2023–2027.
10. maí 2023, þskj. 1761 á 153. lögþ.
Framkvæmd hafin.
Þingsályktunartillaga um aðgerðaáætlun um þjónustu við eldra fólk fyrir árin 2023– 2027 var lögð fram af þáverandi félags- og vinnumarkaðsráðherra og byggist á stjórnarsáttmála ríkisstjórnarinnar og viljayfirlýsingu félags- og vinnumarkaðsráðherra, heilbrigðisráðherra, fjármálaráðherra, Sambands íslenskra sveitarfélaga og Landssambands eldri borgara um að auka samstarf varðandi málefni eldra fólks. Þverfaglegt samstarf félags- og heilbrigðisþjónustu er grundvallaratriði til að ná fram samlegðaráhrifum fagþekkingar á hvoru sviði fyrir sig og tryggja þannig betri þjónustu við stækkandi þjóðfélagshóp, m.a. með samþættingu á þjónustu, forvörnum, heilsueflingu og aukinni virkni. Aðgerðaáætlunin innifelur alls 19 aðgerðir sem skipt er í fimm þætti, hverjum með sínum undirverkefnum. Þættirnir eru: Samþætting, virkni, upplýsing, þróun og heimili. Vinna er hafin við 12 aðgerðir og fjórum er lokið. Verkefnastjórn, skipuð af þáverandi félags- og vinnumarkaðsráðherra og heilbrigðisráðherra, hefur umsjón með framkvæmd og innleiðingu aðgerðaáætlunarinnar.
Þingsályktun 16/153 um framfylgd ályktana Vestnorræna ráðsins árið 2022.
23. maí 2023, þskj. 1841 á 153. lögþ.
Framkvæmd hafin.
Utanríkisráðuneytið hefur umsýslu með framfylgd ályktana Vestnorræna ráðsins með því að safna upplýsingum um gang mála hjá fagráðuneytum sem að málinu koma og upplýsa Vestnorræna ráðið um hvort og hvað hefur verið gert vegna þeirra. Í þessu tilviki er um að ræða framfylgd ályktana Vestnorræna ráðsins um ungt fólk á Vestur-Norðurlöndum, um útlistun og samanburð á áætlunum og fyrirkomulagi vestnorrænu landanna í náttúrutengdri ferðaþjónustu og aðgengi að náttúru og um vestnorrænt samstarf á sviði jafnréttis. Áfram verður unnið að málunum.
Heilbrigðisráðuneyti.
Þingsályktun 19/153 um aðgerðaáætlun í geðheilbrigðismálum fyrir árin 2023–2027.
31. maí 2023, þskj. 1912 á 153. lögþ.
Framkvæmd hafin.
Þingsályktunartillaga heilbrigðisráðherra um aðgerðaáætlun í geðheilbrigðismálum fyrir árin 2023–2027 var samþykkt á Alþingi þann 31. maí 2023. Með ályktuninni ályktaði Alþingi að hrinda í framkvæmd 27 aðgerðum í geðheilbrigðismálum, í samræmi við þingsályktun um stefnu í geðheilbrigðismálum til ársins 2030, nr. 26/152, og að gert yrði ráð fyrir framkvæmdinni við gerð fjárlaga hvers árs.
Þingsályktunartillagan um aðgerðaáætlun í geðheilbrigðismálum byggist á vinnu samráðshóps helstu hagaðila í geðheilbrigðismálum á landsvísu sem heilbrigðisráðherra skipaði í febrúar 2022. Samráðshópurinn vann drög að aðgerðaáætluninni sem birt voru til umsagnar í samráðsgátt stjórnvalda og í framhaldi af því lögð fyrir Alþingi sem þingsályktunartillaga.
Aðgerðum áætlunarinnar er lýst með tilliti til tilgangs, ábyrgðar á framkvæmd, samstarfsaðilum og áætluðum samfélagsáhrifum. Aðgerðaráætlunin samanstendur af 27 aðgerðum; tveimur er lokið, 11 aðgerðir eru hafnar og 14 aðgerðir eru á byrjunarstigi.
Innviðaráðuneyti.
Þingsályktun 2/154 um um stefnumótandi áætlun í málefnum sveitarfélaga fyrir árin 2024–2038 og aðgerðaáætlun fyrir árin 2024–2028.
5. desember 2023, þskj. 686 á 154. lögþ.
Framkvæmd hafin.
Stefnumótandi áætlun í málefnum sveitarfélaga fyrir árin 2024–2038 ásamt aðgerðaáætlun til fimm ára var samþykkt á Alþingi þann 5. desember 2023. Stjórnartillagan var sett fram eftir víðtækt samráð við íbúa, sveitarstjórnir og aðra hagsmunaaðila um allt land og er áhersla einkum lögð á tvö meginmarkmið. Fyrra markmiðið er að sveitarfélög á Íslandi verði öflug og sjálfbær og ýti undir lýðræðislega virkni íbúa. Seinna markmiðið er að sjálfstjórn og ábyrgð sveitarfélaga verði virt og tryggð verði sem jöfnust réttindi og aðgengi íbúa að þjónustu. Skilgreindar hafa verið áherslur við hvort meginmarkmið um sig sem leiða til skilgreindra aðgerða eða til samþættingar við aðgerðir í öðrum opinberum áætlunum.
Aðgerðaáætlun stefnunnar hefur að geyma 18 aðgerðir á sviði fjármála, þjónustu, lýðræðis og stafrænnar umbreytingar. Helstu nýmæli aðgerðaáætlunarinnar felast í því að innan hennar eru aðgerðir á ábyrgð annarra ráðuneyta í þágu ungra barna, fólks með fötlun og umhverfis. Rétt eins og í fyrri áætlun ber Samband íslenskra sveitarfélaga einnig ábyrgð á nokkrum aðgerðum, m.a. um lýðræðisvirkni, stafræna umbreytingu og fagteymi vegna eineltis, kynferðislegrar áreitni og kynbundins ofbeldis í garð kjörinna fulltrúa.
Framkvæmd fjögurra aðgerða er ekki hafin. Gert er ráð fyrir að vinna við aðgerð 1 um mótun viðmiða um sjálfbæra þróun sveitarfélaga á sviði samfélags og umhverfis hefjist veturinn 2025–2026. Vinna við mótun viðmiða um fjárhaglega sjálfbærni hefur verið á bið á meðan unnið er að því að samræma reikningsskil sveitarfélaga sem er mikilvægur þáttur í þessari vinnu. Aðgerð 11 snýr að því að greina áskoranir búsetufrelsis út frá gildandi lögum. Sérstaklega verði skoðað hvort ástæða sé til breytinga á lögum um lögheimili og aðsetur. Til stóð að hefja vinnu við verkefnið haustið 2024 en verkefnið var sett á bið vegna stjórnarslita í október 2024. Í kjölfar þess að ný ríkisstjórn tók til starfa og með breytingu á forsetaúrskurði um skiptingu stjórnarmálefna milli ráðuneyta í Stjórnarráði Íslands í mars 2025 færðust lög um lögheimili og aðsetur frá innviðaráðuneytinu til dómsmálaráðuneytisins. Næstu skref í verkefninu verða því stigin í samráði þessara tveggja ráðuneyta. Aðgerð 14 um fjölmenningu í starfsliði sveitarfélaga hefur verið á bið meðan unnið er að stefnumótun í málefnum innflytjenda en gert er ráð fyrir að þar verði aðgerðir sem tali beint inn í aðgerðina eins og hún er skilgreind. Tekin verður ákvörðun um næstu skref þegar aðgerðaáætlun liggur fyrir. Loks hefur aðgerð 17 um ábyrgðarskiptingu og samfellda þjónustu verið á bið en margt hefur áunnist í að skýra verkaskiptingu ríkis og sveitarfélaga sl. misseri, m.a. í tengslum við börn með fjölþættan vanda og uppbyggingu hjúkrunarheimila.
Framkvæmd einnar aðgerðar er lokið, þ.e. aðgerð 5 um endurskoðun regluverks um Jöfnunarsjóð sveitarfélaga en ný heildarlög um sjóðinn voru samþykkt á Alþingi í júlí 2025. Markmið með nýju lögunum eru að bæta gæði jöfnunar, einfalda útreikninga og skipulag sjóðsins og tryggja að sjóðurinn fylgi þróun sveitarfélagagerðar.
Framkvæmd annarra aðgerða er hafin og er vinna við nokkrar þeirra langt komin. Sem dæmi má nefna frumvarp um endurskoðun sveitarstjórnarlaga sem birt hefur verið í samráðsgátt stjórnvalda og lagt verður fram á Alþingi á haustþingi 2025. Fjórar aðgerðir tengjast frumvarpinu en fyrst og fremst er um að ræða aðgerð 2 um endurskoðun sveitarstjórnarlaga en einnig aðgerð 4 um endurskoðun fjármálaviðmiða sveitarfélaga, aðgerð 6 um feril kostnaðarmats lagafrumvarpa og annarrar stefnumótunar þegar kostnaður gæti fallið á sveitarfélögin og aðgerð 12 um skilgreiningu á lágmarksþjónustu sveitarfélaga. Unnið er að endurskoðun tekjustofna sveitarfélaga sbr. aðgerð 3, m.a. með frumvarpi um breytingar á lögum um tekjustofna sveitarfélaga sem lagt verður fram á Alþingi vorið 2026. Með frumvarpinu verða lagðar til viðeigandi breytingar á lögum með það að markmiði að tryggja nærsamfélagi sem fyrst sanngjarnari hlutdeild en nú er í ávinningi vegna raforkuframleiðslu. Vinna við aðgerð 7 um kortlagningu á aðgerðum sveitarfélaganna á sviði umhverfis- og loftslagsmála er langt komin. Gagnaöflun er lokið en alls bárust svör frá 37 sveitarfélögum. Unnið er að kortlagningu á upplýsingum og samantekt um niðurstöður verður birt haustið 2025. Unnið er að aðgerð 18 um vellíðan ungra barna og barnafjölskyldna innan aðgerðahóps forsætisráðuneytisins um tæklun umönnunarbilsins frá fæðingarorlofi til leikskóla. Aðgerðahópurinn skal skila forsætisráðherra, félags- og húsnæðismálaráðherra og mennta- og barnamálaráðherra tillögu að tímasettri áætlun um að loka umönnunarbilinu á samningstíma gildandi kjarasamninga á almennum vinnumarkaði eigi síðar en 1. nóvember 2025. Þá er hafin framkvæmd á flestum þeim aðgerðum sem Samband íslenskra sveitarfélaga ber ábyrgð á, s.s. aðgerð 9 um mótun fagteymis vegna kynferðislegrar og kynbundinnar áreitni, aðgerð 13 um þróun þjónustu sveitarfélaga og aðgerð 16 um stafræna umbreytingu sveitarfélaga.
Menningar-, nýsköpunar- og háskólaráðuneyti.
Þingsályktun 12/153 um tónlistarstefnu fyrir árin 2023–2030.
3. maí 2023, þskj. 1684 á 153. lögþ.
Framkvæmd hafin.
Tillaga til þingsályktunar um tónlistarstefnu fyrir árin 2023–2030 byggist á tillögum starfshóps sem ráðherra menningarmála skipaði 1. desember 2020 og skilaði skýrslu sinni vorið 2021. Hlutverk starfshópsins var að rýna umhverfi tónlistargeirans á Íslandi, skoða hvernig stuðnings- og sjóðakerfi tónlistar væri best skipulagt, leggja drög að tónlistarstefnu og skilgreina hlutverk og ramma tónlistarmiðstöðvar, sem ráðgert var að setja á laggirnar.
Skýrsla starfshópsins fól m.a. í sér drög að tónlistarstefnu og upplegg fyrir nýjan tónlistarsjóð. Á grunni þeirrar skýrslu var unnið að frekari mótun tónlistarstefnu með aðkomu hagaðila og annarra aðila tengdum menningu og listum. Við mótun stefnunnar var hliðsjón höfð af öðrum tengdum stefnum og sérstaklega menningarsókn sem er aðgerðaáætlun um listir og menningu til ársins 2030.
Í tónlistarstefnunni var lögð fram aðgerðaáætlun í 32 liðum og hefur henni verið hrint í framkvæmd. Vel flestar aðgerðirnar eru vel á veg komnar og ber þar hæst stofnun Tónlistarmiðstöðvar og sameining tónlistarsjóðs, hljóðritasjóðs og útflutningssjóðs íslenskrar tónlistar í einn deildaskiptan tónlistarsjóð sem styrkir fjölbreyttari verkefni en áður var. Endurskoðun aðalnámskrár tónlistarskólanna er í vinnslu og tónlistarráð hefur verið skipað til að vera stjórnvöldum innan handar í málefnum tónlistar og taka þátt í mótun stefnu Tónlistarmiðstöðvar. Aðgerðir tengdar stuðningi við útflutning íslenskrar tónlistar fara fram í gegnum tónlistarsjóð og tónlistarmiðstöð hefur umsýslu með því verkefni.
Þingsályktun 14/153 um myndlistarstefnu til 2030.
23. maí 2023, þskj. 1762 á 153. lögþ.
Framkvæmd hafin.
Þingsályktun um myndlistarstefnu til 2030 var samþykkt á Alþingi 10. maí 2023. Þingsályktunin og útgefin stefna byggir á vinnu verkefnahóps með fulltrúum stjórnvalda og myndlistarlífs, stofnana- og stuðningskerfis, félagasamtaka og atvinnulífs myndlistar sem var falið að móta heildstæða stefnu um málefni myndlistar á Íslandi til ársins 2030.
Í myndlistarstefnunni eru lögð til fjögur meginmarkmið og 18 aðgerðir til að ná meginmarkmiðum stefnunnar. Í meðfylgjandi töflu má sjá framgang aðgerða myndlistarstefnu:
| Aðgerð myndlistarstefnu | Staða |
|---|---|
| 1. Sterk staða myndlistar | Framkvæmd lokið |
| 2. Myndlistarkennsla | Framkvæmd hafin |
| 3. Aukið aðgengi að Listasafni Íslands | Framkvæmd ekki hafin |
| 4. Aukið samstarf um rannsóknir | Framkvæmd hafin |
| 5. Greining á stöðu Listasafns Íslands | Framkvæmd lokið |
| 6. Stofnun Myndlistarmiðstöðvar | Framkvæmd lokið |
| 7. Myndlistarráð verði gert sýnilegra og staða þess styrkt | Framkvæmd lokið |
| 8. Myndlistarsjóður verði efldur | Framkvæmd lokið |
| 9. List í opinberu rými – breytt skipulag og framkvæmd | Framkvæmd hafin |
| 10. Hagvísar | Framkvæmd ekki hafin |
| 11. Skattumhverfi myndlistar | Framkvæmd hafin |
| 12. Endurskoðuð skilgreining á myndlist í tollalögum | Framkvæmd hafin |
| 13. Endurgreiðslukerfi vegna þátttöku í alþjóðlegum kaupstefnum | Framkvæmd hafin |
| 14. Könnun á mögulegum hvötum til listaverkakaupa fyrirtækja | Framkvæmd hafin |
| 15. Markviss alþjóðleg kynning og þátttaka | Framkvæmd lokið |
| 16. Samstarf og þátttaka í erlendu samstarfi á sviði myndlistar | Framkvæmd lokið |
| 17. Gestavinnustofur | Framkvæmd hafin |
| 18. Höfundaréttarmál | Framkvæmd hafin |
Þingsályktun 15/153 um aðgerðaáætlun um eflingu barnamenningar fyrir árin 2024–2028.
23. maí 2023, þskj. 1840 á 153. lögþ.
Framkvæmd hafin.
Í samræmi við áherslur í stjórnarsáttmála ríkisstjórnarinnar skipaði forsætisráðherra í mars 2022 starfshóp um mótun tillögu um framtíðarstefnumótun um eflingu barnamenningar og til að meta árangur af starfsemi Barnamenningarsjóðs frá árinu 2018. Þá var starfshópnum falið að meta samlegðaráhrif eða aukið samstarf sjóðsins við barnamenningarverkefnið List fyrir alla. Þingsályktun þessi byggist á tillögu starfshóps um framtíðarstefnumótun um eflingu barnamenningar, þingsályktun um menningarstefnu íslenska ríkisins frá 2013, nr. 16/141, og Menningarsókn – aðgerðaáætlun í menningarmálum til ársins 2030 en barnamenning er meðal megináherslna beggja stefna.
Meginmarkmið aðgerðaáætlunarinnar sem lögð er fram í þingsályktuninni er að auka samhæfingu hlutaðeigandi aðila, efla stefnumótun á sviði barnamenningar og samþættingu hennar við starfsemi opinberra menningarstofnana og -sjóða sem leggi reglulega áherslu á barnamenningu við úthlutanir og hvetji þannig samfélag listafólks til nýsköpunar á þessum vettvangi. Áhersla er jafnframt lögð á aukið framboð lista, menningar- og listfræðslu fyrir börn og ungmenni og lagt til að starfsemi barnamenningarverkefnisins List fyrir alla og Barnamenningarsjóðs Ísland verði fest í sessi.
Gerð er tillaga um að verkefnið List fyrir alla verði varanlegt verkefni sem hefur það meginhlutverk að miðla listkynningum og menningarverkefnum í skólum landsins, gjarnan í samstarfi við opinberar menningarstofnanir. Listheimsóknir verði þannig sjálfsagður hluti skólastarfs á meðan skólaskylda varir og reglulegir listviðburðir hluti af daglegu lífi barna og ungmenna.
Lagt er til að Barnamenningarsjóður Íslands verði varanlegur sjóður sem njóti framlaga af fjárlögum. Meginhlutverk Barnamenningarsjóðs Íslands verður að styrkja menningarverkefni fyrir börn og ungmenni, einkum verkefni listamanna, list- og menningartengdra stofnana, félagasamtaka og annarra sem sinna lista- og menningarstarfi í samræmi við opinbera menningarstefnu. Þá felur tillagan í sér að sett verði á fót Miðstöð barnamenningar sem hafi yfirumsjón með starfsemi barnamenningarverkefnisins List fyrir alla og Barnamenningarsjóðs Íslands.
Barnamenningarsjóður heyrði frá stofnun undir forsætisráðuneytið en færðist til menningar- og viðskiptaráðuneytis við samþykkt þingsályktunar og er nú í ráðuneyti menningar, nýsköpunar og háskóla. Stjórn miðstöðvar barnamenningar var skipuð af ráðherra en stjórnin fer jafnframt með stjórn barnamenningarsjóðs. Settar voru reglur um starfsemi sjóðsins sem birtar voru í Stjórnartíðindum. Rannís sér um umsýslu og vörslu sjóðsins og árlega er úthlutað úr sjóðnum. Samkvæmt tillögunni skyldi upphæð sjóðsins vera 120 m.kr. á ári en sjóðurinn hefur sætt aðhaldskröfu og verður úthlutun 2026 um 100 m.kr.
Ekki hefur tekist að tryggja fjármögnun fyrir stofnun Miðstöðvar barnamenningar en leitað er leiða til að fylgja eftir því hlutverki sem miðstöðinni er ætlað samkvæmt efni þingsályktunarinnar. Unnið er að stefnumótun í málaflokknum og barnamenningarverkefnið List fyrir alla verður tryggt í sessi á vegum menningar-, nýsköpunar- og háskólaráðuneytis.
Þingsályktun 17/153 um aðgerðaáætlun í málefnum hönnunar og arkitektúrs fyrir árin 2023–2026.
30. maí 2023, þskj. 1893 á 153. lögþ.
Framkvæmd hafin.
Þingsályktun um aðgerðaáætlun í málefnum hönnunar og arkitektúrs fyrir árin 2023–2026 var samþykkt á Alþingi í lok maí 2023. Unnið er að framgangi alls 14 aðgerða áætlunarinnar.
Í meðfylgjandi töflu má sjá yfirlit yfir stöðu aðgerðanna:
| Aðgerð | Staða | Ábyrgð | |
|---|---|---|---|
| 1 | Efling Hönnunarsjóðs | Framkvæmd hafin | MNH |
| 2 | Skilgreining mælikvarða og miðlun virðisauka hönnunar | Framkvæmd hafin | MNH |
| 3 | Virkjun hönnunardrifinnar nýsköpunar | Framkvæmd hafin | MNH |
| 4 | Lög um málefni hönnunar og arkitektúrs | Framkvæmd ekki hafin | MNH |
| 5 | Aukning hlutar hönnuða í úthlutun listamannalauna | Framkvæmd lokið | MNH |
| 6 | Samfélagsleg nýting hönnunardrifinnar nýsköpunar | Framkvæmd lokið | MNH |
| 7 | Aukið vægi hönnunar í útboðum og samkeppnum | Framkvæmd hafin | Ríkiskaup |
| 8 | Heildstæð stefnumótun í mannvirkjagerð | Framkvæmd hafin | IRN |
| 9 | Miðlægur rannsóknavettvangur fyrir innviði | Framkvæmd hafin | IRN |
| 10 | Aukið framboð náms og endurmenntunar í hönnunargreinum | Framkvæmd hafin | MNH |
| 11 | Verndun, miðlun og rannsóknir á menningararfi íslensks arkitektúrs | Framkvæmd lokið | MNH |
| 12 | Safnafræðsla í Hönnunarsafni Íslands | Framkvæmd lokið | MNH |
| 13 | Fræðsla um höfundarétt og hönnunarvernd | Framkvæmd hafin | MNH |
| 14 | Þátttaka í Feneyjatvíæringnum í arkitektúr | Framkvæmd lokið | MNH |
Mennta- og barnamálaráðuneyti.
Þingsályktun 4/154 um framkvæmdaáætlun á sviði barnaverndar 2023–2027.
11. desember 2023, þskj. 723 á 154. lögþ.
Framkvæmd hafin.
Mennta- og barnamálaráðherra skal leggja fyrir Alþingi framkvæmdaáætlun til fjögurra ára í senn að loknum sveitarstjórnarkosningum sbr. 5. gr. barnaverndarlaga, nr. 80/2002. Þingsályktun um framkvæmdaáætlun í barnavernd 2023–2027 er byggð á markmiðum barnaverndarlaga sem eru að tryggja börnum viðunandi uppeldisskilyrði og veita börnum sem búa við óviðunandi aðstæður og börnum sem stofna heilsu sinni og þroska í hættu nauðsynlega aðstoð.
Í framkvæmdaáætluninni er lögð áhersla á mannréttindi, þátttöku barna og að hver og ein aðgerð taki mið af þeim fjölbreytta hópi barna og fjölskyldna sem barnavernd þjónustar. Þá miða aðgerðir framkvæmdaáætlunarinnar að umfangsmiklum úrbótum í þjónustu við börn og fjölskyldur til að mynda með því að samhæfa verklag fyrir barnaverndarþjónustu á Íslandi og styrkja meðferðarúrræði barnaverndar.
Í framkvæmdaáætluninni eru lagðar áherslur á 10 aðgerðir og eru margar af þeim aðgerðum nú þegar hafnar. Þar má meðal annars nefna vinnu við heildarendurskoðun á barnaverndarlögum sem hefur verið í víðtæku samráði við hagaðila en frumvarp þess efnis var á þingmálaskrá 155. löggjafarþings. Þá hefur Barna- og fjölskyldustofa hafið innleiðingu á nýju verklagi í barnavernd auk þess að skipaður hefur verið starfshópur vegna könnunar alvarlegra atvika sem tengjast börnum.
Utanríkisráðuneyti.
Þingsályktun 8/153 um staðfestingu ákvarðana sameiginlegu EES-nefndarinnar nr. 69/2021 og nr. 70/2021 um breytingar á XIX. viðauka við EES-samninginn (Neytendavernd) og nr. 270/2022 um breytingu á XXII. viðauka við EES-samninginn (Félagaréttur).
8. mars 2023, þskj. 1276, 153. lögþ.
Framkvæmd hafin.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvarðana nr. 69/2021 og nr. 70/2021 hinn 1. febrúar 2024. Ákvarðanirnar öðluðust gildi 1. apríl 2024. Stefnt er að tilkynningu um uppfyllingu stjórnskipulegra skilyrða vegna ákvörðunar nr. 270/2022 eins fljótt og auðið er.
Þingsályktun 11/153 um staðfestingu ákvarðana sameiginlegu EES-nefndarinnar nr. 59/2021 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn, nr. 145/2022 og nr. 329/2022 um breytingar á IX. viðauka (Fjármálaþjónusta) við EES-samninginn, nr. 333/2022 um breytingu á X. viðauka (Almenn þjónusta) við EES-samninginn og nr. 337/2022 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) og bókun 37 (sem inniheldur skrána sem kveðið er á um í 101. gr.) við EES-samninginn.
3. maí 2023, þskj. 1683, 153. lögþ.
Framkvæmd hafin.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar sameiginlegu EES-nefndarinnar nr. 59/2021 hinn 1. febrúar 2024 og öðlaðist hún gildi 1. apríl 2024.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar sameiginlegu EES-nefndarinnar nr. 145/2022 hinn 15. júní 2023 og öðlaðist hún gildi 1. ágúst 2023.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar sameiginlegu EES-nefndarinnar nr. 329/2022 hinn 26. maí 2023 og öðlaðist hún gildi 1. október 2024.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar sameiginlegu EES-nefndarinnar nr. 337/2022 hinn 21. maí 2024 og öðlaðist hún gildi 1. maí 2025.
Stefnt er að tilkynningu um uppfyllingu stjórnskipulegra skilyrða vegna ákvörðunar nr. 333/2022 eins fljótt og auðið er.
Þingsályktun 1/154 um afstöðu Íslands vegna átaka fyrir botni Miðjarðarhafs.
5. nóvember 2023, þskj. 522, 154. lögþ.
Framkvæmd hafin.
Þingsályktunartillagan var lögð fram af utanríkismálanefnd Alþingis en tilefnið var hryðjuverkaárás Hamas-samtakanna á Ísrael 7. október 2023 og viðbrögð Ísraelsríkis við henni.
Hernaðaraðgerðir Ísraels á Gaza standa enn yfir, tveimur árum eftir hryðjuverkaárás Hamas. Mannfall hefur verið mikið í röðum óbreyttra palestínskra borgara í aðgerðum Ísraelshers, gríðarleg eyðilegging á innviðum átt sér stað á Gaza og mikil og viðvarandi neyð skapast.
Í samræmi við ályktun Alþingis hefur Ísland ítrekað og margoft kallað eftir tafarlausu vopnahléi af mannúðarástæðum, óheftu aðgengi neyðaraðstoðar og annarra nauðþurfta og undantekningalausri virðingu við alþjóðalög. Þá hefur verið margítrekuð sú krafa að Hamas láti alla gísla sína lausa og leggi niður vopn. Utanríkisráðherra hefur markvisst beitt rödd Íslands í þessa veru og hefur Ísland átt aðild að fjölda yfirlýsinga, í hópi líkt þenkjandi ríkja, þess efnis á árinu 2025. Þá kynnti utanríkisráðherra fyrir utanríkismálanefnd 8. september sl. aðgerðir sem íslensk stjórnvöld eru með í undirbúningi til að bregðast við ástandinu og lina þjáningar óbreyttra borgara á Gaza.
Sérstök ástæða er til að geta þess að í febrúar 2025 skilaði Ísland inn skriflegri greinargerð til Alþjóðadómstólsins í Haag í ráðgefandi álitsmáli sem allsherjarþing Sameinuðu þjóðanna beindi til dómstólsins, á grundvelli ályktunar sem þar var samþykkt 19. desember 2024, um lagalegar skyldur Ísraels til að tryggja viðveru og starfsemi Sameinuðu þjóðanna, annarra alþjóðastofnana og þriðju ríkja á og í tengslum við hernumin svæði Palestínu. Í greinargerðinni eru undirstrikaðar ófrávíkjanlegar skyldur Ísraels sem hernámsaðila að mannúðarrétti. Þetta var í fyrsta skipti sem Ísland stóð eitt að greinargerð til Alþjóðadómstólsins í Haag og í samræmi við ofangreinda ályktun Alþingis, var lögð rík áhersla á að alþjóðalögum sé fylgt í einu og öllu í þágu mannúðar, öryggis almennra borgara og verndar borgaralegra innviða.
Í ályktun Alþingis var ríkisstjórninni jafnframt falið að beita sér fyrir viðbótarframlagi til rannsóknar á brotum á alþjóðalögum í átökunum fyrir botni Miðjarðarhafs. Íslensk stjórnvöld hafa fylgt því eftir með auknum stuðningi til Alþjóðlega sakamáladómstólsins sem hefur lögsögu yfir alþjóðaglæpum sem framdir eru í Palestínu. Undir lok árs 2024 veittu stjórnvöld 30 milljón króna viðbótarframlag til dómstólsins og eru frekari framlög til skoðunar. Ísland hefur jafnframt verið skýrt í afstöðu sinni á alþjóðlegum vettvangi að íslensk stjórnvöld muni uppfylla samstarfsskyldu sína gagnvart dómstólnum, þ.m.t. með því að framfylgja handtökuskipunum hans ef til þess kæmi.
Ísland hlaut kosningu í mannréttindaráð Sameinuðu þjóðanna í október 2024 og tók þar sæti til þriggja ára 1. janúar 2025. Á þeim vettvangi hefur Ísland einnig haldið aðalatriðum ályktunarinnar á lofti, þ. á m. í ávarpi sem utanríkisráðherra flutti sjálf í ráðherraviku mannréttindaráðsins í febrúar 2025. Ísland hefur stutt dyggilega við Palestínuflóttamannaaðstoð Sameinuðu þjóðanna (UNRWA). Undanfarin tvö ár hafa verkefni stofnana Sameinuðu þjóðanna og annarra alþjóðastofnana í Palestínu verið studd með 988 milljón króna framlagi og þar af runnu 578 milljónir króna til UNRWA, 160 milljónir króna til Samhæfingarskrifstofu aðgerða Sameinuðu þjóðanna í mannúðarmálum (OCHA), 160 milljónir króna til Alþjóðabankans og 40 milljónir króna til Matvælaáætlunar Sameinuðu þjóðanna (WFP). Aðrar stofnanir sem fengu stuðning á sama tímabili voru m.a. Mennta-, vísinda- og menningarmálastofnun Sameinuðu þjóðanna (UNESCO) og tvenn palestínsk félagasamtök sem starfa að heilbrigðismálum og jafnréttismálum.
Í júní 2025 aðstoðuðu íslensk stjórnvöld sextán einstaklinga, þar af sjö börn, með dvalarleyfi á Íslandi við að komast frá Gaza til Íslands. Sérstakur verkefnahópur á vegum utanríkisráðuneytisins vann að verkefninu í góðu samstarfi við dómsmálaráðuneytið og Útlendingastofnun. Mikil samvinna átti sér stað við yfirvöld í Jórdaníu og Ísrael, líkt þenkjandi ríki sem hafa áður unnið að slíkum verkefnum, sem og alþjóðastofnanir.
Í janúar 2024 voru undirritaðir nýir rammasamningar um áframhaldandi stuðning íslenskra stjórnvalda við CERF og Samhæfingarskrifstofu aðgerða Sameinuðu þjóðanna í mannúðarmálum (OCHA) til fimm ára. Í febrúar sama ár var undirritaður nýr samstarfssamningur um stuðning Íslands við Alþjóðaráð Rauða krossins (International Committee of the Red Cross, ICRC) til þriggja ára og í apríl 2024 var undirritaður nýr rammasamningur um áframhaldandi stuðning íslenskra stjórnvalda við Matvælaáætlun Sameinuðu þjóðanna (WFP) til fimm ára. Þá var á sama tíma undirritaður nýr rammasamningur um áframhaldandi stuðning íslenskra stjórnvalda við Flóttamannastofnun Sameinuðu þjóðanna (UNHCR) til fimm ára. Endurnýjun rammasamninga við samstarfsstofnanir í mannúðarmálum hefur haldist í hendur við samþykkt nýrrar þróunarsamvinnustefnu fyrir tímabilið 2024–2028.
Þingsályktun 5/154 um stefnu um alþjóðlega þróunarsamvinnu Íslands fyrir árin 2024–2028.
15. desember 2023, þskj. 811, 154. lögþ.
Framkvæmd hafin.
Þingsályktunartillagan var lögð fram af utanríkisráðherra í samræmi við lög nr. 121/2008 um alþjóðlega þróunarsamvinnu sem kveður á um að ráðherra skuli leggja fram stefnu í málaflokknum á fimm ára fresti ásamt aðgerðaáætlun til tveggja ára í senn. Utanríkisráðuneytið hefur því starfað á grundvelli stefnunnar frá 1. janúar 2024. Við framkvæmdina hefur verið byggt á aðgerðaáætlun 2024–2025 ásamt því sem unnið hefur verið að því að koma nýjum og skerptum áherslum í framkvæmd. Í stefnunni er lögð sérstök áhersla á stuðning við fjóra málaflokka; mannréttindi og jafnrétti kynjanna, mannauð og grunnstoðir samfélaga, loftslagsmál og náttúruauðlindir auk mannúðaraðstoðar og starfs í þágu stöðugleika og friðar. Mannréttindi og jafnrétti kynjanna annarsvegar og loftslags- og umhverfismál hins vegar eru jafnframt þverlæg málefni sem tekið er tillit til í öllu starfi. Ísland starfar með fjölbreyttum aðilum við framkvæmd stefnunnar, þ.e. tvíhliða samstarfslöndum, fjölþjóðlegum stofnunum, félagasamtökum, GRÓ Þekkingarmiðstöð þróunarsamvinnu, aðilum atvinnulífs og fræðasamfélaginu. Með alþjóðlegri þróunarsamvinnu leggja íslensk stjórnvöld sitt af mörkum í baráttunni gegn fátækt og fyrir bættum lífsskilyrðum í fátækustu löndum heims, og er hún mikilvægur þáttur í að Ísland uppfylli pólitískar, lagalegar og siðferðilegar skyldur sínar sem ábyrg þjóð í samfélagi þjóðanna.
Þingsályktanir frá 2023 þar sem framkvæmd telst lokið og umfjöllun er óbreytt frá síðustu skýrslu.
Fjármála- og efnahagsráðuneyti.
Þingsályktun 23/153 um fjármálaáætlun fyrir árin 2024–2028, 9. júní 2023, 153. lögþ.
Utanríkisráðuneyti.
Þingsályktun 18/153 um kaup á færanlegu neyðarsjúkrahúsi fyrir Úkraínu, 31. maí 2023, þskj. 1911, 153. lögþ.
Þingsályktun 3/154 um staðfestingu ákvarðana sameiginlegu EES-nefndarinnar nr. 190/2022 frá 10. júní 2022 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið), nr. 191/2022 frá 10. júní 2022 um breytingu á XIII. viðauka (Flutningastarfsemi), nr. 17/2023 frá 3. febrúar 2023 um breytingu á IX. viðauka (Fjármálaþjónusta) og nr. 50/2023 frá 17. mars 2023 um breytingu á V. viðauka (Frjáls för launþega) og VIII. viðauka (Staðfesturéttur) við EES-samninginn, 5. desember 2023, þskj. 383, 154. lögþ.
Yfirlit yfir framkvæmd ályktana Alþingis frá árinu 2022.
Forsætisráðuneyti.
Þingsályktun 20/152 um minnisvarða um eldgosið í Heimaey.
13. júní 2022, þskj. 1227 á 152. lögþ.
Framkvæmd hafin.
Þingsályktunartillaga var lögð fram af forsætisráðherra og mælti tillagan fyrir um að forsætisráðherra yrði falið að skipa nefnd til að undirbúa kaup á minnisvarða í tilefni þess að á árinu 2023 yrðu 50 ár liðin frá Heimaeyjargosinu. Tillagan var samþykkt á Alþingi í júní 2022 og í kjölfarið var skipuð undirbúningsnefnd með tveimur fulltrúum skv. tillögu bæjarstjórnar Vestmannaeyjabæjar, tveimur tilnefndum af Alþingi og einum án tilnefningar, sem jafnframt gegndi formennsku í nefndinni. Tekin var ákvörðun um að ráðast í gerð minnisvarða á grundvelli hugmyndar listamannsins Ólafs Elíassonar. Enn á eftir að ganga frá uppsetningu verksins og tengdum framkvæmdum, s.s. gönguleið að verkinu, en vonir standa til að minnisvarðinn verði afhentur í lok þessa árs.
Nefndarálit með frávísunartillögu um tillögu til
þingsályktunar um tímasetta aðgerðaáætlun um einföldun regluverks.
14. júní 2022, þskj. 1292 á 152. lögþ.
Framkvæmd hafin.
Þingsályktunartillagan mælti fyrir um að forsætisráðherra væri falið að hafa forgöngu um að ríkisstjórnin gerði tímasetta aðgerðaáætlun um einföldun regluverks og að við vinnuna yrði miðað við að uppfylla að minnsta kosti markmið stöðuskýrslu ráðgjafarnefndar um opinberar eftirlitsreglur um einföldun gildandi regluverks frá september 2014 og sértækar jafnt sem almennar aðgerðir útlistaðar og tímasettar.
Í nefndaráliti meiri hluta efnahags- og viðskiptanefndar sagði að í tillögunni fælist að aðgerðaáætlun forsætisráðherra yrði kynnt á vorþingi 2022. Það myndi ekki nást. Meiri hlutinn tæki undir að einfalda þyrfti regluverk en teldi aftur á móti ekki æskilegt að slíkar aðgerðir og gerð áætlana byggðist á stöðuskýrslu sem gerð var fyrir tæplega átta árum. Margt hafði breyst innan íslensks stjórnkerfis og þyrftu slíkar aðgerðir að grundvallast á nýjustu gögnum og upplýsingum sem völ er á.
Meiri hlutinn lagði því til að tillögunni yrði vísað til ríkisstjórnarinnar og henni falið að gera úttekt á nauðsyn þess að regluverk yrði einfaldað. Ekki hefur upp á síðkastið verið ráðist í skipulegt átak í þessu efni þvert á ráðuneyti. Við undirbúning lagasetningar er þetta markmið þó ætíð haft í huga. Rétt er að geta þess að forræði á vönduðum löggjafarháttum er nú hjá dómsmálaráðherra.
Atvinnuvegaráðuneytið fer með framkvæmd laga nr. 27/1999, um opinberar eftirlitsreglur, en upphaflega var sú löggjöf á forræði forsætisráðuneytis. Í byrjun aldarinnar var einföldunarstarf í Stjórnarráðinu á köflum tengt þeirri löggjöf og sérstakri ráðgjafarnefnd sem þar var gert ráð fyrir. Með tilkomu samráðsgáttar stjórnvalda og aukinna krafna og gátlista við gerða lagafrumvarpa og reglugerða, m.a. um nauðsyn og tilgang, hefur almennt dregið úr vægi laga nr. 27/1999. Víða er í almennri stefnumótun kveðið á um einföldun regluverks á tilgreindum sviðum (samanber til hliðsjónar orkustefnu, nýsköpunarstefnu, ferðamálastefnu, loftslagsstefnu og matvælastefnu). Í vinnu við gerð atvinnustefnu, sem leidd er af forsætisráðuneyti, er ráðgert að sérstaklega verði fjallað um einföldun regluverks og aðgerðir þar að lútandi.
Dómsmálaráðuneyti.
Þingsályktun 21/152 um aðgerðaáætlun í málefnum hinsegin fólks fyrir árin 2022–2025.
13. júní 2022, þskj. 1228 á 152. lögþ.
Framkvæmd hafin.
Þingsályktun um aðgerðaáætlun í málefnum hinsegin fólks fyrir árin 2022–2025 var lögð fram af forsætisráðherra og samþykkt á Alþingi í júní 2022. Áætlunin er sú fyrsta sem snýr eingöngu að málefnum hinsegin fólks. Aðgerðaáætlunin var unnin í samstarfi við samtök hinsegin fólks og felur í sér 21 aðgerð en hver og ein þeirra miðar að því að bæta stöðu og réttindi hinsegin fólks, samfélaginu öllu til hagsbóta. Aðgerðirnar eru margvíslegar og snerta sumar mörg svið og þar af leiðandi fleiri en eitt ráðuneyti, sem og stofnanir, sveitarstjórnir, félagasamtök og hagsmunaaðila. Lögð er áhersla á fræðslutengd verkefni og vitundarvakningu um málefni hinsegin fólks, enda mikilvægt að auka þekkingu og búa til farveg fyrir málefnalega umræðu um stöðu og réttindi hinsegin fólks. Jafnframt er vikið að lagabreytingum, rannsóknum, stefnumótun og fleiru.
Innleiðingu verkefna í aðgerðaáætluninni er fylgt eftir með mælaborði sem birt er á vef Stjórnarráðsins og er staða verkefna uppfærð tvisvar á ári, í apríl og október. Vinna við flest verkefnin í aðgerðaáætluninni er komin vel á veg enda rennur áætlunin sitt skeið á enda í lok yfirstandandi árs. Stefnt er að því að ný aðgerðaáætlun í málefnum hinsegin fólks taki við af gildandi áætlun í janúar árið 2026 og gildi til loka ársins 2029.
Félags- og húsnæðismálaráðuneyti.
Þingsályktun 29/152 um framkvæmdaáætlun í málefnum innflytjenda fyrir árin 2022–2025.
16. júní 2022, þskj. 1364 á 152. lögþ.
Framkvæmd hafin.
Gildandi framkvæmdaáætlun var samþykkt á Alþingi í júní árið 2022 og gildir fyrir árin 2022–2025 en hún var lögð fram á Alþingi af félags- og vinnumarkaðsráðherra í samræmi við 7. gr. laga um málefni innflytjenda, nr. 116/2012. Í áætluninni eru 34 aðgerðir, þar af er vinna ekki hafin vegna tveggja aðgerða, tíu aðgerðir eru hafnar, fjórtán aðgerðir eru komnar vel á veg og er átta aðgerðum lokið. Í meðfylgjandi töflu má sjá stöðuna á þeim aðgerðum sem um ræðir.
| Aðgerð | Staða |
|---|---|
| 1.1. Mótun stefnu í málefnum innflytjenda, flóttafólks og fjölmenningar | Lokið |
| 1.2. Ráðgjafarstofa fyrir innflytjendur | Lokið |
| 1.3. Gagnaöflun og þekkingarmiðlun | Hafin |
| 1.4. Fræðsla fyrir starfsfólk ríkis og sveitarfélaga | Komin vel á veg |
| 1.5. Fjölmenningarstefnur og móttökuáætlanir sveitarfélaga | Hafin |
| 1.6. Fræðsla og upplýsingar um íslenskt samfélag verði aðgengilegar á helstu tungumálum innflytjenda | Komin vel á veg |
| 1.7. Samfélagstúlkun | Ekki hafin |
| 2.1. Þátttaka barna og ungmenna í íþrótta- og æskulýðsstarfi | Hafin |
| 2.2. Ungmenni af erlendum uppruna sem eru hvorki í vinnu né námi | Hafin |
| 2.3. Fötluð börn af erlendum uppruna og stuðningur við aðstandendur þeirra | Lokið |
| 2.4. Innflytjendur á húsnæðismarkaði | Ekki hafin |
| 2.5. Aldraðir af erlendum uppruna | Lokið |
| 2.6. Ofbeldi | Komin vel á veg |
| 3.1. Mat á fyrri þekkingu | Komin vel á veg |
| 3.2. Mat á menntun | Komin vel á veg |
| 3.3. Stuðningur við móðurmál og virkt fjöltyngi | Lokið |
| 3.4. Íslenskunám fullorðinna innflytjenda og umsækjenda um alþjóðlega vernd | Komin vel á veg |
| 3.5. Fjölgun kennara og fagfólks af erlendum uppruna innan menntakerfisins | Hafin |
| 3.6. Raunfærnimat fyrir innflytjendur | Komin vel á veg |
| 3.7. Rafrænt hæfnimiðað stöðumat í íslensku og stuðningsefni | Hafin |
| 3.8. Samfella í fræðslu umsækjenda um alþjóðlega vernd og flóttafólks | Hafin |
| 4.1. Launajafnrétti á vinnumarkaði | Komin vel á veg |
| 4.2. Hlutfall innflytjenda í opinberum störfum og áhrifastöðum | Hafin |
| 4.3. Atvinnuleysi meðal innflytjenda | Komin vel á veg |
| 4.4. Vinnuvernd og réttindi á vinnumarkaði | Komin vel á veg |
| 4.5 Endurskoðun laga um atvinnuréttindi útlendinga | Lokið |
| 5.1. Samræmd þjónusta við fólk með vernd á Íslandi | Lokið |
| 5.2. Handbók um móttöku og þjónustu við flóttafólk | Lokið |
| 5.3. Líðan og þátttaka flóttafólks og umsækjenda um alþjóðlega vernd | Hafin |
| 5.4. Fræðsla fyrir flóttafólk, umsækjendur um alþjóðlega vernd og fagaðila sem koma að þjónustu við flóttafólk | Komin vel á veg |
| 5.5. Fylgdarlaus börn sem sækja um alþjóðlega vernd | Komin vel á veg |
| 5.6. Stuðningur við fylgdarlaus börn og ungmenni sem hafa fengið vernd | Hafin |
| 5.7. Flóttafólk á vinnumarkaði | Komin vel á veg |
| 5.8. Móttaka og þjónusta við flóttafólk í sérstaklega viðkvæmri stöðu | Komin vel á veg |
Heilbrigðisráðuneyti.
Þingsályktun 26/152 um stefnu í geðheilbrigðismálum til ársins 2030.
15. júní 2022, þskj. 1382 á 152. lögþ.
Framkvæmd hafin.
Þingsályktunartillaga heilbrigðisráðherra um stefnu í geðheilbrigðismálum til ársins 2030 var samþykkt á Alþingi þann 15. júní 2022. Tillögunni er ætlað að styrkja stefnumótun á sviðinu og tekur mið af ályktunum Alþingis um heilbrigðisstefnu og lýðheilsustefnu og er í henni lögð áhersla á grunngildi sem hvetja til einstaklingsmiðaðrar heilbrigðisþjónustu og stuðning við heilsueflingu á öllum æviskeiðum. Efni þingsályktunarinnar skiptist í fjóra áhersluþætti og er ítarlega fjallað um hvern og einn þeirra í greinargerð.
Til að hrinda stefnunni í framkvæmd verða gerðar áætlanir um aðgerðir til fimm ára í senn í samráði við helstu hagsmunaaðila.
Innviðaráðuneyti.
Þingsályktun 27/152 um stefnumótandi byggðaáætlun fyrir árin 2022–2036.
15. júní 2022, þskj. 1383 á 152. lögþ.
Framkvæmd hafin.
Í samræmi við lög um byggðaáætlun og sóknaráætlanir, nr. 69/2015, lagði innviðaráðherra fram á Alþingi stefnumótandi byggðaáætlun fyrir árin 2022–2036 sem samþykkt var einróma í júní 2022. Í henni er sett fram aðgerðaáætlun fyrir árin 2022–2026 þar sem skilgreindar eru 44 aðgerðir. Öll ráðuneyti hafa beina aðkomu að aðgerðaáætluninni þar sem þau bera ábyrgð á minnst einni aðgerð hvert. Framkvæmdin gengur vel og allar aðgerðir eru hafnar, og tíu aðgerðum þegar lokið. Á vef innviðaráðuneytis er að finna upplýsingar um stöðu allra aðgerðanna.
Í mars 2025 lagði innviðaráðherra skýrslu fyrir Alþingi um framkvæmd byggðaáætlunar fyrir árin 2022–2023. Þar er upplýst um framvindu allra 44 aðgerða áætlunarinnar.
Menningar-, nýsköpunar- og háskólaráðuneyti.
Þingsályktun 22/152 um framfylgd ályktana Vestnorræna ráðsins árið 2021.
13. júní 2022, þskj. 1229 á 152. lögþ.
Framkvæmd hafin.
Í þingsályktun Alþingis um framfylgd ályktana Vestnorræna ráðsins árið 2021 er skorað á ríkisstjórnina að vinna að framkvæmd tveggja ályktana Vestnorræna ráðsins sem samþykktar voru á ársfundi ráðsins 1. september 2021, um aukið vestnorrænt samstarf á vettvangi umhverfis- og loftslagsmála (nr. 1/2021) og um samstarf vestnorrænna háskóla um fjarkennslu (nr. 2/2021). Í ályktun Vestnorræna ráðsins nr. 2/2021 hvetja menntamálaráðherrar Íslands, Grænlands og Færeyja til aukins samstarfs landanna þriggja um háskólamenntun með hjálp fjarkennslu. Tækniþróun, bætt fjarskipti og aukin reynsla af fjarkennslu hefur undanfarin ár gjörbreytt möguleikum íbúa strjálbýlla svæða til að sækja sér fjölbreytta háskólamenntun. Fjarnám getur haft jákvæð áhrif á þroska einstaklinga, búsetu í heimabyggð og þannig á heilbrigði samfélaga á norðurslóðum. Með það í huga er hvatt til þess að menntamálaráðherrar landanna þriggja skoði möguleika á að innleiða fjarnám í samstarfi háskóla í löndunum þremur.
Í ljósi lögbundins sjálfstæðis háskóla samkvæmt lögum um háskóla, nr. 63/2006, koma stjórnvöld ekki með beinum hætti að ákvörðunum íslenskra háskóla um framboð fjarnáms í Grænlandi og Færeyjum, sbr. 3. mgr. 2. gr. laganna. Hlutverk stjórnvalda er að styðja við eflingu háskólanáms, sem getur m.a. falið í sér eflingu á alþjóðlegu starfi háskóla í samstarfi við aðra erlenda háskóla.
Háskóla-, iðnaðar- og nýsköpunarráðherra setti nýjar reglur um fjárframlög til háskóla, nr. 755/2024. Reglurnar, sem tóku gildi hinn 27. júní 2024, eru afrakstur af heildarendurskoðun ráðuneytisins á fjármögnun háskóla og fela í sér nýja og árangurstengda fjármögnun háskóla. Hið nýja fyrirkomulag fjármögnunar getur stutt við þau markmið sem koma fram í ályktun Vestnorræna ráðsins nr. 2/2021. Í nýju fyrirkomulagi fjármögnunar ráðast fjárveitingar til kennslu og rannsókna í háskólum einnig af því hvernig háskólar sinna byggðahlutverki með framboði staðnáms á landsbyggðinni. Þá er sérstaklega gert ráð fyrir eflingu fjarnáms um allt land í samræmi við áherslur í stjórnarsáttmála ríkisstjórnarinnar og markmiðum í gildandi fjármálaáætlun.
Umhverfis-, orku- og loftslagsráðuneyti.
Þingsályktun 24/152 um áætlun um vernd og orkunýtingu landsvæða.
15. júní 2022, þskj. 1299 á 152. lögþ.
Framkvæmd lokið.
Þingsályktun nr. 24/152 um áætlun um vernd og orkunýtingu landsvæða var samþykkt á Alþingi 15. júní 2022 á grundvelli laga um verndar- og orkunýtingaráætlun, nr. 48/2011. Þar ályktaði Alþingi að fela ríkisstjórninni að vinna að framkvæmd áætlunarinnar og kom áætlunin í stað verndar- og orkunýtingaráætlunar samkvæmt þingsályktun nr. 13/141, með síðari breytingu.
Samkvæmt þingsályktun nr. 24/152 um áætlun um vernd og orkunýtingu landsvæða skal tryggt að nýting landsvæða þar sem er að finna virkjunarkosti byggist á langtímasjónarmiðum og heildstæðu hagsmunamati þar sem tekið verði tillit til verndargildis náttúru og menningarsögulegra minja, hagkvæmni og arðsemi ólíkra nýtingarkosta og annarra gilda sem varða þjóðarhag, svo og hagsmuna þeirra sem nýta þessi sömu gæði, með sjálfbæra þróun að leiðarljósi. Í áætluninni skal í samræmi við markmið laga nr. 48/2011 lagt mat á verndar- og orkunýtingargildi landsvæða og efnahagsleg, umhverfisleg og samfélagsleg áhrif nýtingar, þ.m.t. verndunar.
Svæði flokkuð í verndarflokk fara í friðlýsingarferli samkvæmt ákvæðum laga þar um, virkjunarkosti í nýtingarflokki er heimilt að þróa áfram og virkjunarkostir í biðflokki eru áfram í umfjöllun hjá verkefnisstjórn áætlunarinnar.
Utanríkisráðuneyti.
Nefndarálit með frávísunartillögu um tillögu til þingsályktunar um vistmorð (sameiginleg með dómsmálaráðuneyti og umhverfis-, orku- og loftslagsráðuneyti).
15. júní 2022 þskj. 1330 á 152. lögþ.
Framkvæmd hafin.
Utanríkisráðuneyti hefur falið sendiskrifstofum að fylgjast með framvindu og umfjöllun um málefnið, m.a. mögulegum undirbúningi löggjafar eða stefnumörkunar í líkt þenkjandi samstarfsríkjum, auk umfjöllunar hjá alþjóðastofnunum og í fjölþjóðasamstarfi. Auk þess kemur málefnið til umfjöllunar eftir atvikum í samráði norrænna utanríkisráðuneyta. Á vettvangi aðildarríkjaþings Alþjóðlega sakamáladómstólsins hefur Vanúatú lagt fram formlega breytingartillögu til að skilgreina vistmorð sem alþjóðaglæp. Efnisleg rýni og umfjöllun tillögunnar er enn óhafin meðal undirstofnana aðildarríkjaþingsins. Hefur því ekki verið tilefni til frekara samráðs innan stjórnkerfisins að svo stöddu. Áfram verður fylgst með málinu.
Þingsályktun 4/153 um staðfestingu ákvarðana sameiginlegu EES-nefndarinnar nr. 396/2021 um breytingu á XX. viðauka (Umhverfismál), nr. 398/2021 um breytingu á II. viðauka (Tæknilegar reglugerðir, staðlar, prófanir og vottun) og XX. viðauka (Umhverfismál), nr. 49/2022 um breytingu á II. viðauka (Tæknilegar reglugerðir, staðlar, prófanir og vottun), nr. 77/2022 um breytingu á X. viðauka (Almenn þjónusta) og XIII. viðauka (Flutningastarfsemi), og nr. 78/2022 og nr. 155/2022 um breytingu á XIII. viðauka (Flutningastarfsemi) við EES-samninginn.
6. desember 2022, þskj. 724 á 153. lögþ.
Framkvæmd hafin.
Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar nr. 77/2022 hinn 16. júní 2023 og öðlaðist ákvörðunin gildi 1. ágúst 2023. Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvörðunar nr. 396/2021 hinn 1. febrúar 2024. Öðlaðist ákvörðunin gildi 1. apríl 2024. Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, vegna ákvarðana nr. 398/2021, nr. 78/2022 og nr. 155/2022 hinn 1. febrúar 2024. Öðluðust ákvarðanirnar gildi 1. apríl 2024. Ísland tilkynnti um uppfyllingu stjórnskipulegra skilyrða, sbr. 103. gr. EES-samningsins, hinn 1. febrúar 2024, vegna ákvörðunar nr. 49/2022 og öðlaðist ákvörðunin gildi 1. apríl 2024.
Þingsályktun 2/153 um staðfestingu ákvörðunar sameiginlegu EES-nefndarinnar nr. 6/2022 um breytingu á II. viðauka (Tæknilegar reglugerðir, staðlar, prófanir og vottun) við EES-samninginn.
9. nóvember 2022, þskj. 471 á 153. lögþ.
Framkvæmd hafin.
Stefnt er að tilkynningu um uppfyllingu stjórnskipulegra skilyrða, sbr. 103. gr. EES-samningsins, eins fljótt og auðið er.
Þingsályktanir frá 2022 þar sem framkvæmd telst lokið og umfjöllun er óbreytt frá síðustu skýrslu.
Forsætisráðuneyti.
Þingsályktun 6/152 um breytta skipan ráðuneyta í Stjórnarráði Íslands, 27. janúar 2022, þskj. 386 á 152. lögþ.
Fjármála- og efnahagsráðuneyti.
Nefndarálit með frávísunartillögu um frumvarp til laga um breytingu á lögum um vexti og verðtryggingu og húsaleigulögum (aðgerðir til að sporna við áhrifum verðbólgu á húsnæðislán og húsaleigu), 13. júní 2022, þskj. 1262 á 152. lögþ.
Þingsályktun 23/152 um fjármálaáætlun fyrir árin 2023–2027, 14. júní 2022, þskj. 1271 á 152. lögþ.
Þingsályktun 10/152 um fjármálastefnu fyrir árin 2022–2026, 23. febrúar 2022, þskj. 564 á 152. lögþ.
Heilbrigðisráðuneyti.
Þingsályktun 25/152 um mótun stefnu í aðdraganda aðgerðaáætlunar í heilbrigðisþjónustu við aldraða til ársins 2030, 15. júní 2022, þskj. 1381 á 152. lögþ.
Utanríkisráðuneyti.
Þingsályktun 1/153 um staðfestingu ákvarðana sameiginlegu EES-nefndarinnar nr. 53/2021, nr. 54/2021, nr. 385/2021 og nr. 146/2022 um breytingar á IX. viðauka (Fjármálaþjónusta) við EES-samninginn. 9. nóvember 2022, þskj. 470 á 153. lögþ.
Þingsályktun 17/152 um staðfestingu ákvörðunar sameiginlegu EES-nefndarinnar nr. 171/2021 um breytingu á IX. viðauka (Fjármálaþjónusta) við EES-samninginn.
30. maí 2022, þskj. 1097 á 152. lögþ.
Þingsályktun 9/152 um staðfestingu ákvörðunar sameiginlegu EES-nefndarinnar nr. 214/2020 um breytingu á IX. viðauka (Fjármálaþjónusta) við EES-samninginn. 8. febrúar 2022, þskj. 472 á 152. lögþ. 30. maí 2022 þskj. – 1095 á 152. lögþ.
Þingsályktun 10/152 um fjármálastefnu fyrir árin 2022–2026. 23. febrúar 2022, þskj. 564 á 152. lögþ.
Þingsályktun 14/152 um staðfestingu ákvörðunar sameiginlegu EES-nefndarinnar nr. 22/2020 um breytingu á IX. viðauka (Fjármálaþjónusta) við EES-samninginn. 30. maí 2022, þskj. 1094 á 152. lögþ.
Þingsályktun 16/152 um staðfestingu ákvarðana sameiginlegu EES-nefndarinnar nr. 274/2021 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) og bókun 37 (sem inniheldur skrána sem kveðið er á um í 101. gr.) við EES-samninginn og nr. 275/2021 um breytingu á XI. viðauka (Rafræn fjarskipti, hljóð- og myndmiðlun og upplýsingasamfélagið) við EES-samninginn. 30. maí 2022, þskj. 1096 á 152. lögþ.
Þingsályktun 12/152 um staðfestingu ákvörðunar sameiginlegu EES-nefndarinnar nr. 383/2021 um breytingu á IX. viðauka (Fjármálaþjónusta) við EES-samninginn. 28. apríl 2022, þskj. 953 á 152. lögþ.
Þingsályktun 7/152 um staðfestingu ákvörðunar sameiginlegu EES-nefndarinnar nr. 50/2021 um breytingu á IX. viðauka (Fjármálaþjónusta) við EES-samninginn. 8. febrúar 2022, þskj. 470 á 152. lögþ.
Þingsályktun 18/152 um staðfestingu ákvörðunar sameiginlegu EES-nefndarinnar nr. 76/2022 um breytingu á IX. viðauka (Fjármálaþjónusta) við EES-samninginn. 30. maí 2022, þskj. 1098 á 152. lögþ.
Þingsályktun 8/152 um staðfestingu ákvörðunar sameiginlegu EES-nefndarinnar nr. 31/2022 um breytingu á II. viðauka (Tæknilegar reglugerðir, staðlar, prófanir og vottun) við EES-samninginn (lífræn framleiðsla). 8. febrúar 2022, þskj. 471 á 152. lögþ.
Þingsályktun 11/152 um fullgildingu fríverslunarsamnings Íslands, Konungsríkisins Noregs og Furstadæmisins Liechtenstein og Sameinaða konungsríkisins Stóra-Bretlands og Norður-Írlands. 7. mars 2022, þskj. 633 á 152. lögþ.
Þingsályktun 13/152 um staðfestingu samninga Íslands við Noreg annars vegar og Danmörku fyrir hönd Færeyja hins vegar um afmörkun landgrunnsins handan 200 sjómílna á svæðinu milli Færeyja, Íslands, meginlands Noregs og Jan Mayen (Síldarsmugan). 30. maí 2022, þskj. 1093 á 152. lögþ.
Þingsályktun 19/152 um staðfestingu viðbótarsamninga við Norður-Atlantshafssamninginn um aðild Lýðveldisins Finnlands og Konungsríkisins Svíþjóðar. 7. júní 2022, þskj. 1177 á 152. lögþ.
Þingsályktun 3/153 um staðfestingu ákvarðana sameiginlegu EES-nefndarinnar nr. 138/2022 og nr. 249/2022 um breytingar á IX. viðauka (Fjármálaþjónusta) og nr. 151/2022 um breytingu á IX. viðauka (Fjármálaþjónusta) og bókun 37 (sem inniheldur skrána sem kveðið er á um í 101. gr.) við EES-samninginn. 6. desember 2022, þskj. 723 á 153. lögþ.
Þingsályktun 5/153 um staðfestingu rammasamnings um fiskveiðar milli ríkisstjórnar Íslands og landsstjórnar Færeyja og samnings milli Íslands og Færeyja um fiskveiðar innan íslenskrar og færeyskrar lögsögu árið 2023. 15. desember 2022, þskj. 849 á 153. lögþ.
Yfirlit yfir framkvæmd ályktana Alþingis frá árinu 2021.
Atvinnuvegaráðuneyti.
Þingsályktun 20/151 um mótun sjálfbærrar iðnaðarstefnu.
6. maí 2021, þskj. 1384 á 151. lögþ.
Framkvæmd hafin.
Tillaga til þingsályktunar um mótun sjálfbærrar iðnaðarstefnu var lögð fram af hálfu alþingismanna á 151. löggjafarþingi. Í tillögunni var lagt til að Alþingi ályktaði að fela ferðamála-, iðnaðar- og nýsköpunarráðherra að koma á fót nefnd sem ynni að opinberri iðnaðarstefnu. Tillagan var áður lögð fram á 149. löggjafarþingi en náði ekki fram að ganga. Þá var sambærileg tillaga lögð fram á 151. löggjafarþingi. Flutningsmenn tillögunnar töldu nauðsynlegt að í iðnaðarstefnu yrði litið til langs tíma og í henni yrði sett fram skýr framtíðarsýn með mælanlegum viðmiðum. Áhersla skyldi lögð á að benda á mikilvægi þess að iðnaðarstefnan tæki ekki eingöngu tillit til efnahags þjóðarinnar heldur tæki einnig mið af líffræðilegum fjölbreytileika Íslands og hamfarahlýnun jarðar.
Innan háskóla-, iðnaðar- og nýsköpunarráðuneytis hófst vinna 2023 um mótun sjálfbærrar iðnaðarstefnu. Fyrir liggja drög að sjálfbærri iðnaðarstefnu sem eftir á að fullvinna, setja í samráð og rýna með hlutaðeigandi ráðuneytum og hagaðilum. Málefni iðnaðar færðust yfir til atvinnuvegaráðuneytis í mars 2025 og eru fyrirliggjandi drög að sjálfbærri iðnaðarstefnu þar til nánari skoðunar, m.a. með hliðsjón af vinnu við mótun atvinnustefnu til 2035 sem forsætisráðuneytið leiðir.
Félags- og húsnæðismálaráðuneyti.
Þingsályktun 14/151 um aðgerðir vegna rakaskemmda í fasteignum.
23. febrúar 2021, þskj. 933 á 151. lögþ.
Framkvæmd hafin.
Alþingi samþykkti 23. febrúar 2021 þingsályktun um að leggja til nauðsynlegar breytingar á lögum og reglugerðum til að uppræta og koma í veg fyrir tjón vegna rakaskemmda á fasteignum.
Með þingsályktuninni fól Alþingi félags- og barnamálaráðherra að grípa til aðgerða sem stuðla að því að draga úr líkum á tjóni vegna rakaskemmda í fasteignum, greiða fyrir nauðsynlegum viðgerðum vegna rakaskemmda og efla þekkingu fagaðila á rakaskemmdum og forvörnum tengdum þeim. Félags- og barnamálaráðherra greip til ýmissa aðgerða í þessa átt en málaflokkurinn mannvirkjamál var fluttur til innviðaráðuneytis, sbr. forsetaúrskurð 28. nóvember 2021, og hefur starfinu verið haldið áfram í innviðaráðuneyti.
Í janúar 2023 skilaði innviðaráðherra skýrslu til Alþingis um tjón af völdum rakaskemmda og myglusvepps í fasteignum og um réttarstöðu eigenda þeirra, sjá þingskjal 940 – 268. mál1. Skýrslan veitir upplýsingar um hvernig tryggingavernd varðandi raka- og mygluskemmdir er háttað í nágrannaríkjunum og hvaða aðgerða væri hægt að grípa til hér á landi til að auka tryggingavernd þeirra sem verða fyrir tjóni vegna rakaskemmda á íbúðarhúsnæði.
Skýrslan lýsir ýmsum aðgerðum sem framkvæmdar hafa verið til að efla þekkingu fagaðila á rakaskemmdum og forvörnum tengdum þeim. Til að mynda hafa verið gefin út þrjú leiðbeiningablöð til fagaðila um málefnið, aðgengileg á vefsíðu Húsnæðis- og mannvirkjastofnunar.
Askur – mannvirkjarannsóknarsjóður var settur á stofn árið 2021 og veitir sjóðurinn styrki til mannvirkjarannsókna með áherslu á aukna þekkingu, umbætur og nýsköpun til að mæta samfélagslegum áskorunum á sviði mannvirkjagerðar. Áherslur sjóðsins snúa einkum að samfélagslegum áskorunum í byggingariðnaði, svo sem rakaskemmdum í mannvirkjum og aðgerðum til lækkunar kolefnisspors. Árin 2022–2025 hlutu mörg rannsóknarverkefni tengd raka og myglu í byggingum styrki.
Verkefni sem varða rafræna skráningu fasteigna hafa verið flutt frá Þjóðskrá Íslands til Húsnæðis- og mannvirkjastofnunar (HMS), sem nú hefur sett upp rafræna Mannvirkjaskrá. Nú hafa 14 sveitarfélög, m.a. Reykjavíkurborg, tengst nýju viðmóti HMS sem einfaldar og samræmir ferlið við umsókn og útgáfu byggingarleyfa. Í kerfinu eru vistuð öll hönnunargögn bygginga sem fá byggingarleyfi, tryggt er að lögbundnar úttektir fari fram samkvæmt skoðunarhandbókum HMS og niðurstöður úttekta eru vistaðar rafrænt í skránni. Þetta auðveldar sönnunarstöðu eiganda húsnæðis þegar byggingargalli kemur í ljós, oft mörgum árum eftir eigendaskipti. Í hinni rafrænu skrá er einnig hægt að vista gögn um fyrri byggingargalla og viðgerðir sem farið hafa fram en ofangreindar aðgerðir stuðla að vandaðri mannvirkjagerð til framtíðar.
Þingsályktun 34/151 um hagsmunafulltrúa eldra fólks.
13. júní 2021, þskj. 1826 á 151. lögþ.
Framkvæmd hafin.
Tillaga til þingsályktunar um hagsmunafulltrúa eldra fólks var samþykkt á 151. löggjafarþingi. Tilefni þingsályktunartillögunnar var að aldraðir væru fjölmennur og fjölbreyttur hópur og misjafnlega færir um að gæta að eigin réttindum og hagsmunum. Því væri rík þörf á málsvara fyrir þennan hóp. Samkvæmt þingsályktuninni var þáverandi félags- og barnamálaráðherra falið að stofna starfshóp með hagsmunaaðilum og starfsfólki ráðuneytisins sem semdi frumvarp til laga um embætti hagsmunafulltrúa eldra fólks. Verkefni starfshópsins væri m.a. að meta hvar slíku embætti væri best fyrir komið og hvert umfang þess ætti að vera.
Þáverandi félags- og vinnumarkaðsráðherra skipaði starfshópinn í apríl 2022. Í hópnum áttu sæti fulltrúar Alzheimersamtakanna, Landssambands eldri borgara, Sambands íslenskra sveitarfélaga, heilbrigðisráðuneytisins og félags- og vinnumarkaðsráðuneytisins. Þar sem ekki liggja fyrir formlegar greiningar á því hvar skórinn kreppir helst varðandi ráðgjöf og upplýsingar til eldra fólks lagði hópurinn til, í samstarfi við verkefnastjórn um heildarendurskoðun á þjónustu við eldra fólk, að ráðist yrði í að setja á fót tilraunaverkefni til 2–3 ára um sérstaka ráðgjafarþjónustu fyrir eldra fólk. Samhliða ráðgjöfinni yrði gögnum safnað um þau helstu atriði sem eldra fólk þarf ráðgjöf og stuðning með. Þá eru nú þegar til staðar formlegar eftirlitsstofnanir sem taka við erindum þeirra sem telja að þjónustu sé ábótavant s.s. Gæða- og eftirlitsstofnun velferðarmála, Embætti landlæknis auk úrskurðarnefndar velferðarmála.
Með hliðsjón af framangreindu lagði starfshópurinn til að frekari vinnu við smíði frumvarps um hagsmunafulltrúa fyrir eldra fólk yrði frestað í 2–3 ár til að safna frekari upplýsingum um stöðu hópsins á grunni Gott að eldast, aðgerðaáætlunar um þjónustu við eldra fólk.
Í stefnuyfirlýsingu ríkisstjórnar Samfylkingar, Viðreisnar og Flokks fólksins kemur fram að sérstökum hagsmunafulltrúa eldra fólks verði falið að standa vörð um réttindi þess. Undirbúningur ráðningar hagsmunafulltrúa er í vinnslu hjá félags- og húsnæðismálaráðuneytinu.
Fjármála- og efnahagsráðuneyti.
Nefndarálit með frávísunartillögu um frumvarp til laga um breytingu á lögum um opinber fjármál, nr. 123/2015 (mat á áhrifum stjórnarfrumvarpa).
12. júní 2021, þskj. 1755 á 151. lögþ.
Framkvæmd lokið.
Frumvarpið fól í sér að við mat ráðherra á áhrifum stjórnarfrumvarpa yrði sérstaklega litið til tveggja meginþátta til viðbótar við mat á fjárhagslegum áhrifum frumvarpa, þ.e. til mats á loftslagsáhrifum auk þess sem jafnréttismat það sem framkvæmt hefur verið á hluta frumvarpa yrði gert að almennri reglu. Í álitinu er lagt til að fjármála- og efnahagsráðuneytið taki tillögur frumvarpsins til athugunar þegar farið verður í heildarendurskoðun laga nr. 123/2015.
Í 66. gr. laga um opinber fjármál segir að hver ráðherra skuli leggja mat á áhrif stjórnarfrumvarpa, þ.m.t. fjárhagsleg áhrif, heildarendurskoðun á lögum um opinber fjármál er ekki hafin en brugðist hefur verið við nefndarálitinu án lagabreytinga. Þannig er í samþykkt ríkisstjórnar um undirbúning og frágang stjórnarfrumvarpa og þingsályktunartillagna nú sérstaklega kveðið á um mat á áhrifum stjórnarfrumvarpa á jafnrétti, umhverfi og loftslag.
Nefndarálit með frávísunartillögu um frumvarp til laga um breytingu á lögum um skyldutryggingu lífeyrisréttinda og starfsemi lífeyrissjóða, nr. 129/1997 (sjóðir um sameiginlega fjárfestingu).
12. júní 2021, þskj. 1748 á 151. lögþ.
Framkvæmd lokið.
Með frumvarpinu sem sex alþingismenn lögðu fram var lagt til að XXI. ákvæði til bráðabirgða í lögum um heimild lífeyrissjóða til að eiga allt að 35% af hlutdeildarskírteinum eða hlutum í sjóðum um sameiginlega fjárfestingu eða einstakri deild þeirra yrði gerð varanleg, þó með breytingum.
Í frávísunartillögunni kom fram að efnahags- og viðskiptanefnd styddi þau markmið sem frumvarp þingmanns fól í sér en taldi nauðsynlegt að vinna það nánar í samráði við hagaðila. Nefndin benti á að ákvæði sama efnis og frumvarp þingmannsins innihélt hefði verið lögfest með lögum nr. 37/2020. Við meðferð þeirra laga hefðu komið fram sjónarmið frá Landssamtökum lífeyrissjóða sem voru mjög í samræmi við frumvarp þingmannsins. Með vísan til þessa lagði nefndin til að frumvarpinu yrði vísað til ríkisstjórnar.
Með frumvarpi fjármála- og efnahagsráðherra, sem lagt var fram á 155. löggjafarþingi (þingskjal 307 – 300. mál), var lagt til að lögfest yrði til frambúðar heimild lífeyrissjóða til að eiga allt að 35% af hlutdeildarskírteinum eða hlutum í sjóðum um sameiginlega fjárfestingu sem eingöngu fjárfesta í litlum eða meðalstórum fyrirtækjum skv. 1. og 2. tölul. 3. gr. laga um stuðning við nýsköpunarfyrirtæki eða einstakri deild þeirra, þó aldrei umfram 1% heildareigna sinna í hverjum sjóði. Tillaga frumvarpsins var að meginefni í samræmi við þágildandi tímabundna heimild fyrir utan að lagt var til að skilyrðið um fimm ára innlausnartíma fjárfestingar yrði fellt brott. Frumvarpið varð að lögum 28. nóvember 2024, sbr. 8. gr. laga nr. 140/2024.
Heilbrigðisráðuneyti.
Þingsályktun 29/151 um lýðheilsustefnu til ársins 2030.
12. júní 2021, þskj. 1759 á 151. lögþ.
Framkvæmd hafin.
Þingsályktunartillaga heilbrigðisráðherra um lýðheilsustefnu til ársins 2030 var samþykkt á Alþingi þann 12. júní 2021. Tillögunni er ætlað að styrkja stefnumótun á sviðinu og felur það í sér að leiðarljós lýðheilsustefnu til ársins 2030 verði heilsuefling og forvarnir sem hluti af allri þjónustu innan heilbrigðiskerfisins. Framtíðarsýn fyrir lýðheilsu á Íslandi feli þannig í sér að lýðheilsustarf verði markvisst, á heimsmælikvarða og einkennist m.a. af þverfaglegu samstarfi heilbrigðisþjónustu með áherslu á heilsueflingu og forvarnir. Þá verði lýðheilsustarf metið með því að mæla gæði, öryggi, aðgengi og kostnað sem og kostnaðarhagkvæmni. Til þess að framtíðarsýn þessi verði að veruleika er lögð áhersla á eftirfarandi meginviðfangsefni til þess að styrkja stoðir lýðheilsustarfs hér á landi: 1. Forysta til árangurs, 2. Rétt þjónusta á réttum stað, 3. Fólkið í forgrunni, 4. Virkir notendur, 5. Skilvirk þjónustukaup, 6. Gæði í fyrirrúmi og 7. Hugsað til framtíðar.
Heilbrigðisráðherra hefur lagt fram tvær skýrslur á Alþingi um framkvæmd lýðheilsustefnu, þ.e. á 153. og 154. löggjafarþingi. Stefnt er að framlagningu þriðju skýrslunnar á 157. löggjafarþingi.
Innviðaráðuneyti.
Þingsályktun 13/151 um orkuskipti í flugi á Íslandi
3. febrúar 2021, þskj. 849 á 151. lögþ.
Framkvæmd lokið.
Umhverfis- og samgöngunefnd Alþingis ályktaði að fela samgöngu- og sveitarstjórnarráðherra í samráði við ferðamála-, iðnaðar- og nýsköpunarráðherra og umhverfis- og auðlindaráðherra að setja á fót starfshóp sérfræðinga til að móta stefnu og aðgerðaáætlun um orkuskipti í flugi á Íslandi.
Starfshópurinn átti að gera tillögur um hvernig Ísland gæti orðið í fremstu röð í orkuskiptum í flugi, hvernig styðja mætti við nýsköpun á sviði orkuskipta í flugi, hve fýsilegt landið væri með tilliti til veðurfars og innviða sem þyrftu að vera til staðar hér á landi vegna orkuskipta í flugi, m.a. í tengslum við nýsköpun, umhverfisvæna orkugjafa og þátttöku í prófunum og alþjóðlegri þróun orkuskipta í flugi og þess að sett yrðu markmið um að byrjað yrði að nota umhverfisvæna orkugjafa í innanlandsflugi fyrir árið 2030 og hvernig áætlun um það samrýmdist öðrum áætlunum ríkisins í orkuskiptum, nýsköpun og loftslagsmálum.
Árið 2022 var gerð skýrsla um efnið. Í skýrslunni voru lagðar til aðgerðir til stuðnings við orkuskipti í flugi. Flestar aðgerðirnar eiga sér hliðstæðu í nýuppfærðri aðgerðaráætlun í loftslagsmálum þar sem haldið er utan um framgang þeirra og eru þær á ábyrgð umhverfis-, orku-, og loftslagsráðuneytisins.
Mennta- og barnamálaráðuneyti.
Þingsályktun 28/151 um barnvænt Ísland – framkvæmd barnasáttmála Sameinuðu þjóðanna
10. júní 2021, þskj. 1702 á 151. lögþ.
Framkvæmd lokið.
Í þingsályktun um barnvænt Ísland er að finna tímasetta og fjármagnaða stefnu og aðgerðaáætlun um innleiðingu Barnasáttmála Sameinuðu þjóðanna fyrir árin 2021–2024. Helsta markmið stefnunnar og aðgerðaáætlunarinnar er að uppfylla kröfur Barnaréttarnefndar Sameinuðu þjóðanna og skyldur stjórnvalda samkvæmt barnasáttmálanum. Með stefnunni er lögfestingu sáttmálans fylgt eftir með markvissum hætti og tryggt að sáttmálinn sé rauður þráður í stefnumótun og aðgerðum stjórnvalda. Markmið stefnunnar er enn fremur að tryggja jafnræði og markvissa þátttöku barna og ungmenna innan stjórnsýslunnar, auka samstarf milli opinberra aðila með velferð og réttindi barna að leiðarljósi, tryggja markvisst verklag við hagsmunamat út frá réttindum og velferð barna og auka þekkingu á réttindum barna innan samfélagsins. Gildistími þingsályktunarinnar er liðinn og skýrsla með lokagreinargerð um stöðu aðgerða er aðgengileg á heimasíðu mennta- og barnamálaráðuneytisins.
Þingsályktun 16/151 um menntastefnu fyrir árin 2021–2030
24. mars 2021, þskj. 1111 á 151. lögþ.
Framkvæmd hafin.
Þingsályktunartillagan var lögð fram af þáverandi mennta- og menningarmálaráðherra eftir víðtækt samráð við hagaðila og ráðleggingar sérfræðinga, bæði innlendra og frá Efnahags- og framfarastofnun Evrópu (OECD). Þingsályktunin er innleidd á þremur þiggja ára tímabilum. Fyrsta aðgerðaáætlun menntastefnu fyrir árin 2021–2024 var gefin út haustið 2021. Í áætluninni eru 9 aðgerðir sem skipt er upp í 41 verkþátt. Vinnu við fyrstu aðgerðaáætlun er langt komin, mörgum verkþáttum er lokið en aðrir eru enn í vinnslu eða verða sífelluverkefni. Einn verkþáttur var ekki unnin, það er að vinna hæfnistefnu fyrir Ísland. Vegna uppskiptingar Stjórnarráðsins í febrúar 2022 færðust málefni framhaldsfræðslu, þ.e. fræðslu til einstaklinga með stutta skólagöngu, til félags og vinnumarkaðsráðuneytisins. Þar var ákveðið að hefja heildarendurskoðun á framhaldsfræðslukerfinu í samstarfi við 25 hagsmunaaðila árin 2022–2024. Niðurstöður samráðsins hafa ekki verið birtar en málaflokkurinn var aftur fluttur til mennta- og barnamálaráðuneytis fyrr á þessu ári. Þar er unnið að aðgerðum til umbóta eins og fram kemur í fjárlagafrumvarpi fyrir árið 2026. Einnig seinkaði framkvæmd á þeim verkþáttum sem snúa að innra- og ytra mati skóla vegna ákvörðunar um að leggja niður Menntamálastofnun og færa þau verkefni sem snúa að innra og ytra mati skóla til mennta- og barnamálaráðuneytis. Þar er nú hafin vinna við heildar endurskoðun ytra mats leik-, grunn- og framhaldsskóla. Önnur aðgerðaáætlun menntastefnu var gefin út í júlí 2025. Í annarri aðgerðaáætlun fyrir árin 2025–2027 eru 20 aðgerðir sem skipt er í 102 verkþætti auk þess að tilgreina hverju þurfi að breyta í aðalnámskrám leik-, grunn- og framhaldsskóla til að styðja við aðgerðirnar.
Þingsályktun 33/151 um mótun heildstæðrar stefnu um afreksfólk í íþróttum.
13. júní 2021, þskj. 1825 á 151. lögþ.
Framkvæmd hafin.
Málefni afreksfólks í íþróttum hafa meðal annars verið til skoðunar í starfshóp um stefnu í íþróttamálum sem skipaður var í júlí 2021. Í upphafi árs 2023 var skipaður starfshópur um stöðu og réttindi afreksíþróttafólks með það hlutverk að yfirfara og leggja til breytingar á fyrirkomulagi, löggjöf og öðru sem þurfa þykir til að stuðningur við afreksíþróttafólk hér á landi verði í fremstu röð. Hópurinn skilaði af sér skýrslu 30. apríl 2024 og hefur síðan verið unnið að því að undirbúa innleiðingu tillagna hópsins. Mennta- og barnamálaráðherra skipaði þverpólitískan stýrihóp til að vinna tímasetta innleiðingaráætlun nýrrar afreksstefnu og afreksmiðstöðvar í formi þingsályktunartillögu. Samhliða var stýrihópnum falið að teikna upp áætlun um fjármögnun stefnunnar. Unnið hefur verið af krafti að innleiðingu frá 1. janúar 2025 og gerður samningur við ÍSÍ um innleiðinguna sem er vel á veg komin. Innleiðingaráætlun gerir ráð fyrir að innleiðingu ljúki á árinu 2029.
Nefndarálit með frávísunartillögu til þingsályktunar um launasjóð íslensks afreksíþróttafólks (sameiginleg með fjármála- og efnahagsráðuneyti).
12. júní 2021, þskj. 1752 á 151. lögþ.
Framkvæmd hafin.
Tillagan felur í sér að mennta- og menningarmálaráðherra undirbúi og leggi fram frumvarp til laga um launasjóð íslensks afreksíþróttafólks í samráði við fjármála- og efnahagsráðherra. Samhliða tillögu þessari fjallaði allsherjar- og menntamálanefnd um tillögu til þingsályktunar um mótun heildstæðrar stefnu um afreksfólk í íþróttum. Málin eru efnislega sambærileg og því taldi nefndin fullt tilefni til að þau yrðu unnin í sameiningu innan ráðuneytisins. Það hefur verið gert, eins og nánar hefur verið fjallað um í tengslum við þingsályktun 33/151.
Umhverfis-, orku- og loftslagsráðuneyti.
Nefndarálit með frávísunartillögu um tillögu til þingsályktunar um græna atvinnubyltingu (sameiginleg með forsætisráðuneyti, menningar-, nýsköpunar- og háskólaráðuneyti, innviðaráðuneyti, umhverfis-, orku- og loftslagsráðuneyti, fjármála- og efnahagsráðuneyti, félags- og húsnæðismálaráðuneyti og atvinnuvegaráðuneyti)
12. júní 2021, þskj. 1753 á 151. lögþ.
Framkvæmd lokið.
Meiri hluti efnahags- og viðskiptanefndar vísaði málinu til ríkisstjórnarinnar. Í áliti nefndarinnar kemur fram að í tillögunni séu lögð til mikilvæg atriði er varða atvinnustefnu til framtíðar og græna hagkerfið. Umfang málsins sé hins vegar mikið og lagðar til aðgerðir sem fela sér töluverð fjárútlát af hálfu hins opinbera sem ekki hafi verið gert ráð fyrir í fjárlögum eða fjáraukalögum. Í framhaldinu var þáverandi umhverfis- og auðlindaráðherra falið að taka tillöguna til skoðunar og meðferðar í samráði við viðkomandi ráðherra.
Aukin áhersla hefur verið lögð á samstarf og stuðning umhverfis-, orku- og loftslagsráðuneytisins við nýsköpunarverkefni hvað varðar loftslagsmál, orkuskipti og hringrásarhagkerfið í samstarfi við fyrirtæki, opinber orkufyrirtæki og sveitarfélög.
Ráðuneytið hefur verið með samning við Klak – Icelandic Startups um stuðning við hringrásarhraðalinn Hringiðu en hann getur dregið fram, eflt og stutt nýja tækni og aðferðir sem leysa aðsteðjandi úrlausnarefni í umhverfismálum. Ráðuneytið hefur einnig orðið bakhjarl frumkvöðlakeppninnar Gulleggsins sem er í umsjón Klak – Icelandic Startups. Þá hefur ráðuneytið stutt við nýsköpun á Norðurlandi í samstarfi við Samtök sveitarfélaga á Norðurlandi vestra (SSNV), Samtök sveitarfélaga og atvinnuþróunar á Norðurlandi eystra (SSNE) og Eim í gegnum verkefnið Norðanátt.
Þá var jafnframt gert samkomulag um aðkomu ráðuneytisins að Bláma, sem er samstarfsverkefni ráðuneytisins, Landsvirkjunar, Orkubús Vestfjarða og Vestfjarðastofu. Meginmarkmið Bláma er að styðja við og efla nýsköpun og þróun orkuskiptaverkefna með því að auka hlut vistvæns eldsneytis, vetnis og rafeldsneytis í samgöngum og iðnaði. Eins gerðist ráðuneytið aðili að Orkídeu, sem er samstarfsverkefni Landsvirkjunar, Samtaka sunnlenskra sveitarfélaga og Landbúnaðarháskóla Íslands. Enn fremur hefur ráðuneytið gerst aðili að Eimi á Norðurlandi eystra, sem er samstarfsverkefni með Landsvirkjun, Samtökum sveitarfélaga og atvinnuþróunar á Norðurlandi eystra, Norðurorku og Orkuveitu Húsavíkur. Þá hefur ráðuneytið stofnað samstarfsverkefnið Eygló á Austurlandi með Landsvirkjun og Samtökum sveitarfélaga á Austurlandi. Þá hefur ráðuneytið gerst aðili að Gleipni á Vesturlandi, sem er samstarfsverkefni, m.a. með Landbúnaðarháskóla Íslands, Samtökum sveitarfélaga á Vesturlandi og Landsvirkjun.
Ráðuneytið vann að undirbúningi að nýjum samstarfsverkefnum með atvinnulífinu meðal annars í tengslum við Loftslagsvegvísa atvinnulífsins og uppfærslu á aðgerðaáætlun stjórnvalda í loftslagsmálum sem var birt á árinu 2024.
Starfshópur sem þáverandi ráðherra skipaði haustið 2022 og fékk það hlutverk að koma með tillögur að því hvernig flýta megi innleiðingu hringrásarhagkerfis kynnti sumarið 2023 tillögur sínar: „200 þúsund tonn af tækifærum“. Heitið vísaði til þess að starfshópurinn kortlagði um 200 þúsund tonn af úrgangi sem hafði verið urðaður árlega en sem tækifæri eru til að breyta í verðmæti og draga með því úr sóun. Í framhaldi af kynningu starfshópsins hafði ráðuneytið frumkvæði að stofnun hringrásarklasa í nánu samstarfi við félög, fyrirtæki og klasa. Hringrásarklasinn hefur það hlutverk að fylgja hringrásarverkefnunum eftir á forsendu klasahugmyndafræði, sem felur í sér að lögð er áhersla á að koma verkefnum í framkvæmd með samstarfi hagaðila.
Nefndarálit með frávísunartillögu um frumvarp til laga um brottfall laga um leit, rannsóknir og vinnslu kolvetnis, nr. 13/2001 (bann við leit og vinnslu jarðefnaeldsneytis.
12. júní 2021, þskj. 1788 á 151. lögþ.
Framkvæmd lokið.
Í þingmannafrumvarpi var lagt til að felld yrðu brott lög um leit, rannsóknir og vinnslu kolvetnis, nr. 13/2001, og að með því yrði leit og vinnsla jarðefnaeldsneytis bönnuð hér á landi. Í ákvæði til bráðabirgða var lagt til að ráðherra gerði tillögur um breytingar á öðrum lögum sem nauðsynlegar væru í kjölfar samþykktar frumvarpsins. Meiri hluti nefndarinnar taldi betur fara á því, ef vilji væri til að setja bann við leit og vinnslu jarðefnaeldsneytis, að málið yrði skoðað heildstætt og frumvarp lagt fram sem fæli í sér allar nauðsynlegar breytingar á lögum. Meiri hluti atvinnuveganefndar vísaði frumvarpinu því til ríkisstjórnarinnar til frekari skoðunar og vinnslu.
Frumvarp til laga um breytingu á ýmsum lögum vegna banns við leit, rannsóknum og vinnslu kolvetnis í efnahagslögsögunni (bann við olíuleit) var lagt fram á 152. löggjafarþingi og sett á þingmálaskrá umhverfis-, orku- og loftslagsráðherra á 153. löggjafarþingi sem endurflutt mál en ekki lagt fram. Af hálfu ríkisstjórnar eru ekki uppi áform um að leggja fram slíkt frumvarp á Alþingi.
Nefndarálit með frávísunartillögu um frumvarp til laga um Hálendisþjóðgarð.
9. júní 2021, þskj. 1682 á 151. lögþ.
Framkvæmd lokið.
Í stjórnarsáttmála ríkisstjórnarinnar kemur fram að „stofnaður verði þjóðgarður á þegar friðlýstum svæðum og jöklum á hálendinu með breytingu á lögum um Vatnajökulsþjóðgarð“. Til undirbúnings verkefnisins skipaði þáverandi umhverfis-, orku- og loftslagsráðherra starfshóp 6. maí 2022 sem var falið það hlutverk að vinna skýrslu um stöðu og áskoranir í þjóðgörðum og friðlýstum svæðum. Í skýrslunni eru helstu niðurstöður dregnar saman í svokallaða lykilþætti auk gagnlegra upplýsinga um stöðu málaflokksins. Ein helsta niðurstaða skýrslunnar er að samræma þarf stjórnsýslu og stjórnskipulag stofnana sem reka friðlýst svæði, sem og einfalda og samræma atvinnustefnu og ferli leyfisveitinga. Unnið var að þessum málum m.a. með sameiningu stofnana sem hafa umsjón með friðlýstum svæðum. Ný Náttúruverndarstofnun tók til starfa 1. janúar 2025.
Utanríkisráðuneyti.
Þingsályktun 17/151 um framfylgd ályktana Vestnorræna ráðsins árið 2020 (sameiginleg með félags- og húsnæðismálaráðherra).
27. apríl 2021, þskj. 1297 á 151. lögþ.
Framkvæmd hafin.
Þingsályktunartillagan var lögð fram af Íslandsdeild Vestnorræna ráðsins og var hún samþykkt á Alþingi 27. apríl 2021. Með þingsályktuninni skorar Alþingi á ríkisstjórnina að vinna að framkvæmd þriggja ályktana Vestnorræna ráðsins sem samþykktar voru á ársfundi ráðsins 6. nóvember 2020, um aukið samstarf vestnorrænna samstarfsráðherra Norðurlandanna (nr. 1/2020), um aukið samstarf vestnorrænna ráðherra sem fara með málefni norðurslóða (nr. 2/2020) og um stuðning við aukaaðild Færeyinga og Grænlendinga að Alþjóðaheilbrigðismálastofnuninni (nr. 3/2020).
Utanríkisráðuneytið hefur umsýslu með framfylgd ályktana Vestnorræna ráðsins með því að safna upplýsingum um gang mála hjá fagráðuneytum sem að málinu koma og upplýsa Vestnorræna ráðið um hvort og hvað hefur verið gert vegna þeirra. Í þessu tilviki er um að ræða aukið samstarf vestnorrænna samstarfsráðherra Norðurlanda, um aukið samstarf vestnorrænna ráðherra sem fara með málefni norðurslóða og um stuðning við aukaaðild Færeyinga og Grænlendinga að Alþjóðaheilbrigðismálastofnuninni. Áfram verður unnið að málunum.
Þingsályktun 24/151 um stefnu Íslands í málefnum norðurslóða.
19. maí 2021, þskj. 1478 á 151. lögþ.
Framkvæmd hafin.
Ályktunin byggði á tillögum þingmannanefndar sem utanríkis- og þróunarsamvinnuráðherra skipaði til að endurskoða stefnu Íslands í málefnum norðurslóða, en fyrri stefna var komin til ára sinna (samþykkt 2011). Í nefndinni áttu sæti fulltrúar allra flokka á þingi og skilaði nefndin tillögum sínum 19. mars 2021, en þær urðu grundvöllur þingsályktunartillögu utanríkis- og þróunarsamvinnuráðherra, sem var samþykkt einróma. Þingsályktunin felur ríkisstjórninni að fylgja nítján áhersluþáttum sem spanna allt frá alþjóðlegri samvinnu, sjálfbærri þróun, efnahagslegum tækifærum og vísindarannsóknum til öryggismála og norðurslóðamiðstöðva í Reykjavík og á Akureyri. Ráðherra utanríkismála er ennfremur falið að móta framkvæmdaáætlun með norðurslóðastefnunni í samráði við aðra hlutaðeigandi ráðherra. Vinna við gerð framkvæmdaáætlunarinnar hófst með opnum fundi í Háskólanum á Akureyri, 31. mars 2022, sem jafnframt var fjarfundur. Á fundinum var stefnan kynnt og verkáætlun við mótun framkvæmdaáætlunar fyrir hana. Hinum nítján áhersluþáttum stefnunnar var skipt niður á fimm þemahópa sem safna skyldu tillögum að framkvæmdaþáttum og um hundrað þátttakendur skráðu sig í hópana. Samráð þemahópanna fór að öllu leyti fram með fjarfundum. Hóparnir skiluðu tillögum sínum, alls 75 talsins, 15. september 2022 og var haldinn annar opinn fundur með sama sniði þar sem tillögurnar voru kynntar og ræddar 28. september 2022. Þá tók við starf við forgangsröðun, frágang og framsetningu í nánu samráði við þau ráðuneyti sem hlut eiga að máli. Áætlunin eru nú tilbúin og inniheldur alls 39 tillögur. Gert er ráð fyrir að áætlunin komi til framkvæmdar hjá þeim ráðuneytum, sem ábyrgð bera á hverjum verkþætti fyrir sig.
Þingsályktanir frá 2021 þar sem framkvæmd telst lokið og umfjöllun er óbreytt frá síðustu skýrslu.
Forsætisráðuneyti.
Þingsályktun 21/151 um nýja þýðingu á samningi Sameinuðu þjóðanna um réttindi fatlaðs fólks, 11. maí 2021, þskj. 1402.
Fjármála- og efnahagsráðuneyti.
Þingsályktun 25/151 um fjármálaáætlun fyrir árin 2022–2026, 31. maí 2021 – þskj. 1559 á 151. lögþ.
Nefndarálit með frávísunartillögu um frumvarp um breytingu á ýmsum lögum vegna hækkunar lágmarksiðgjalds til lífeyrissjóðs og ákvæða um tilgreinda séreign (lágmarkstryggingavernd o.fl.), 12. júní 2021 – þskj. 1751 á 151. lögþ.
Nefndarálit með frávísunartillögu um frumvarp til laga um breytingu á lögum um vexti og verðtryggingu, nr. 38/2001 (takmarkanir á notkun verðtryggingar í lánssamningum til neytenda), 12. júní 2021, þskj. 1750 á 151. lögþ.
Menningar-, nýsköpunar- og háskólaráðuneyti.
Þingsályktun 23/151 um ástandsskýrslur fasteigna, 18. maí 2021 – þskj. 1461 á 151. lögþ.
Umhverfis-, orku- og loftslagsráðuneyti.
Þingsályktun 15/151 um mat og endurmótun á tilhögun hættumats og vöktunar vegna náttúruvár.
Utanríkisráðuneyti.
Þingsályktun 4/152 um staðfestingu samnings milli Íslands og Færeyja um fiskveiðar innan íslenskrar og færeyskrar lögsögu árið 2022. 28. desember 2021, þskj. 277 á 152. lögþ.
Þingsályktun 26/151 um aukið samstarf Grænlands og Íslands. 31. maí 2021, þskj. 1560 á 151. lögþ.
Þingsályktun 18/151 um staðfestingu ákvörðunar sameiginlegu EES-nefndarinnar nr. 235/2020 um breytingu á XXII. viðauka (Félagaréttur) við EES- samninginn. 4. maí 2021, þskj. 1347 á 151. lögþ.
Þingsályktun 3/152 um staðfestingu ákvörðunar sameiginlegu EES-nefndarinnar nr. 388/2021 um breytingu á IX. viðauka (Fjármálaþjónusta) við EES-samninginn. 28. desember 2021, þskj. 276 á 152. lögþ.
Þingsályktun 2/152 um staðfestingu ákvörðunar sameiginlegu EES-nefndarinnar nr. 371/2021 um breytingu á II. viðauka (Tæknilegar reglugerðir, staðlar, prófanir og vottun) og bókun 37 (sem inniheldur skrána sem kveðið er á um í 101. gr.) við EES-samninginn (dýralyf). 28. desember 2021, þskj. 275 á 152. lögþ.
Þingsályktun 1/152 um staðfestingu ákvörðunar sameiginlegu EES-nefndarinnar nr. 384/2021 um breytingu á IX. viðauka (Fjármálaþjónusta) við EES-samninginn (endurbótalýsing verðbréfa). 28. desember 2021, þskj. 274 á 152. lögþ.
Þingsályktun 19/151 um staðfestingu ákvörðunar sameiginlegu EES-nefndarinnar nr. 19/2020 um breytingu á IX. viðauka við EES-samninginn (Fjármálaþjónusta). 4. maí 2021, þskj. 1348 á 151. lögþ.
-
↩︎
Skýrsla innviðaráðherra um tjón af völdum rakaskemmda og myglusvepps í fasteignum og um réttarstöðu eigenda þeirra, 153. löggjafarþing 2022-2023, þingskjal 940 – 268. mál.
